Pune Crime News : पुण्यातून एक धक्कादायक प्रकार उघडकीस आला आहे. दारु पिण्यासाठी पैसे देण्यास नकार दिल्याने एका तरुणाने त्याच्या आईवर जीवघेणा हल्ला केला. तरुणाने चाकून सपासप वार करत आईला जखमी केले. हत्येचा प्रयत्न केल्या प्रकरणी पर्वती पोलिसांनी आरोपी तरुणाला अटक केली आहे.

मिळालेल्या माहितीनुसार, कृष्णा कांबळे (वय ३० वर्षे, राहणार सावित्रीबाई फुले वसाहत, सिंहगड रस्ता) असे आरोपी तरुणाचे नाव आहे. तर कौशल्या कांबळे (वय ५५ वर्षे) असे तरुणाच्या आईचे नाव आहे. आरोपीचा मोठा भाऊ बाबासाहेब याने या प्रकरणी पर्वती पोलीस ठाण्यात तक्रार दिली होती. त्यानंतर आरोपीला अटक झाली आहे.

आरोपीला दारुचे आणि अन्य गोष्टींचे व्यसन आहे. तो नोकरी किंवा काही कामधंदा करत नाही. तो आईच्या पैशांवर उदरनिर्वाह करतो. दारु पिण्यासाठीही तो आईकडून पैसे घेत असे. दारुसाठी पैशांची मागणी करुन आरोपी आईला त्रास द्यायला. पैसे न दिल्यास आरोपी कृष्णा हा त्याच्या आईशी गैरवर्तन करत असे, तिला शिव्या देत असे.

गुरुवारी (१४ ऑगस्ट) पहाटे चार-साडेचारच्या सुमारास आरोपी कृष्णाने त्याच्या आईवर चाकूने सपासप वार केले. त्यांच्यामध्ये दारु पिण्यासाठी पैसे देण्यावरुन वाद झाला होता. आरोपीने त्याच्या आईच्या छातीत चाकूने भोसकले. हल्ल्यामध्ये आरोपीची आई कौशल्या गंभीररित्या जखमी झाल्या. त्यानंतर कृष्णा पसार झाला. कौशल्या यांना रुग्णालयात दाखल करण्यात आले. तक्रारीनंतर कृष्णाला पोलिसांनी अटक केली.