अक्षय बडवे, पुणे| १ जुलै २०२४

लोणावळ्यातील भुशी डॅमवर एकाच घरातील पाच जण वाहून गेल्याची मन सुन्न करणारी घटना घडली. ही घटना ताजी असतानाच आता ताम्हिणी घाटामध्ये एक तरुण वाहून गेल्याचे समोर आले आहे. या धक्कादायक घटनेचा व्हिडिओही सध्या सोशल मीडियावर व्हायरल होत आहे. स्टंटबाजी करण्याच्या नादात हा तरुण वाहून गेल्याचे या व्हिडिओमध्ये दिसत आहे.

याबाबत सविस्तर माहिती अशी की, स्टंटबाजी करण्याच्या नादात ताम्हिणी घाटामध्ये एक तरुण वाहून गेल्याची धक्कादायक घटना समोर आली आहे. स्वप्नील धावडे असे वाहून गेलेल्या तरुणाचे नाव असून तो आपल्या जिममधील ३२ जणांच्या ग्रुपसोबत ताम्हिणी घाटात फिरण्यासाठी गेला होता.

शनिवारी (ता. २९ जून) ताम्हिणी घाटात गेलेल्या स्वप्नील धावडेने धबधब्यातील पाण्यात उडी मारल्यानंतर तो जोरदार प्रवाहात बेपत्ता झाला. पाण्याचा वेग जास्त असल्याने त्याला कडेला आले नाही, ज्यामुळे तो पाण्याच्या प्रवाहासोबत वाहून गेला. ताम्हिणीमध्ये बुडालेल्या या तरुणाचा मृतदेह मानगावमध्ये सापडला आहे. या धक्कादायक घटनेचा व्हिडिओ सध्या व्हायरल होत आहे.

दरम्यान, भुशी डॅममध्ये पाच पर्यटक वाहून गेल्यानंतर समोर आलेल्या या घटनेने सर्वत्र खळबळ उडाली आहे. लोणावळा, खंडाळा भागात वर्षाविहारासाठी येणाऱ्या पर्यटकांनी अनोळखी ठिकाणी जाऊ नये. आपला आणि आपल्या कुटुंबाचा जीव धोक्यात घालू नये, भुशी डॅम परिसर, घुबड तलाव, टाटा डॅम, तुंगार्ली डॅम, राजमाची पॉईंट, भागात पर्यटकांनी पोलीस प्रशासनास सहकार्य करावे, असे आवाहन पोलीस प्रशासनाने केले आहे.