पुणे ते नागपूर दरम्यान प्रवास करणाऱ्यांसाठी मोठी बातमी समोर आली आहे. मध्य रेल्वेच्या पुणे विभागांतर्गत दौंड ते मनमाड मार्गावर सुरू असलेल्या दुहेरीकरणाच्या कामामुळे अनेक महत्त्वाच्या रेल्वेगाड्या रद्द करण्यात आल्या आहेत. या कामामुळे पुण्याहून नागपूरकडे आणि नागपुरातून पुण्याकडे जाणाऱ्या रेल्वेगाड्या तब्बल २२ दिवस रद्द करण्यात आल्या आहेत.

पुणे आणि नागपूर दरम्यान रेल्वे वाहतूक प्रवाशांसाठी महाराष्ट्रातील एक महत्त्वपूर्ण दुवा आहे. या मार्गावर अनेक गाड्या नियमितपणे सेवा देतात. ज्यात पुणे–नागपूर एक्सप्रेस , पुणे–नागपूर हमसाफर एक्सप्रेस आणि पुणे–नागपूर गरिब रथ एक्सप्रेस हे प्रमुख आहेत. मध्य रेल्वेच्या दौंड ते मनमाड मार्गावर सुरू असलेल्या दुहेरीकरणाच्या कामामुळे अनेक महत्त्वाच्या रेल्वेगाड्या रद्द करण्यात आल्या आहेत.

दौंड आणि काष्टी स्थानकांदरम्यान सुरू असलेल्या या कामाचा परिणाम पुणे–नागपूरसह मराठवाडा, विदर्भ तसेच दक्षिण व उत्तर भारताकडे जाणाऱ्या रेल्वेसेवांवर झाला आहे. दुहेरीकरणाच्या अंतिम टप्प्यातील प्री-नॉन इंटरलॉकिंग आणि नॉन-इंटरलॉकिंगचे काम २५ जानेवारीपर्यंत सुरू राहणार आहे.

त्यामुळे काही गाड्या २२ दिवसांसाठी रद्द करण्यात आल्या आहेत. रद्द करण्यात आलेल्या गाड्यांमध्ये पुणे–अमरावती एक्सप्रेस, अमरावती–पुणे एक्सप्रेस, अजनी–पुणे एक्सप्रेस, पुणे–अजनी हमसफर, अजनी–पुणे हमसफर तसेच नागपूर–पुणे एक्सप्रेस यांचा समावेश आहे. या गाड्यांवर अवलंबून असलेल्या प्रवाशांची मोठी गैरसोय होणार आहे.