पुण्यातून मोठी बातमी समोर आली आहे. एका हवालदाराने तब्बल दीड लाखांची लाच घेतल्याचे उघडकीस आले आहे. हैदराबाद न्यायालयाने जारी केलेले अजामीनपात्र वॉरंट बजावू नये आणि संबंधित व्यक्तीला अटक टाळून मदत करावी यासाठी लाच मागितल्याचे तक्रारीत म्हटले आहे. लाचलुचपत प्रतिबंधक विभागाने हवालदाराला रंगेहाथ पकडले. या कारवाईदरम्यान आरोपी हवालदाराने पळून जाण्याचा प्रयत्न करत तक्रारदाराच्या छातीचा चावा घेतल्याची धक्कादायक घटना घडली. तसेच एसीबीच्या पथकासोबत धक्काबुक्कीही करण्यात आली.

मिळालेल्या माहितीनुसार, गणेश शहाजी कसपटे असे गुन्हा दाखल करण्यात आलेल्या पोलिस हवालदाराचे नाव आहे. तक्रारदार ज्या कंपनीत काम करतो त्या कंपनीच्या मालकाविरुद्ध हैदराबाद न्यायालयात धनादेश न वटल्याप्रकरणी खटला सुरू आहे. या प्रकरणात न्यायालयाने संबंधित मालकाविरुद्ध अजामीनपात्र वॉरंट जारी केले होते. हे वॉरंट बजावण्यात येऊ नये आणि अटकेची कारवाई टाळण्यात मदत करावी, यासाठी हवालदार गणेश कसपटे याने सुरुवातीला अडीच लाख रुपयांची मागणी केल्याचा आरोप आहे.

दरम्यान, संबंधित व्यक्तीने याबाबत लाचलुचपत प्रतिबंधक विभागाकडे तक्रार दाखल केली. एसीबीने केलेल्या पडताळणीत कसपटे याने तडजोडीअंती दीड लाख रुपये स्वीकारण्यास तयारी दर्शवल्याचे निष्पन्न झाले. त्यानंतर एसीबीच्या पथकाने बुधवारी दुपारी बोट क्लब रस्त्यावरील एका सोसायटीसमोर सापळा रचला.

लाचेची रक्कम स्वीकारताच पथकाने कसपटे याला पकडण्याचा प्रयत्न केला. मात्र, कारवाईची चाहूल लागताच त्याने पळून जाण्याचा प्रयत्न केला. यावेळी त्याने तक्रारदाराच्या छातीचा चावा घेतला तसेच एसीबीच्या अधिकाऱ्यांना धक्काबुक्की केली. काही काळ परिसरात गोंधळाचे वातावरण निर्माण झाले होते. अखेर पथकाने त्याला ताब्यात घेत अटक केली. या प्रकरणी संबंधित पोलिस कर्मचाऱ्याविरुद्ध गुन्हा दाखल करण्यात आला असून, एसीबीकडून अधिक तपास सुरू आहे.