विकास काटे, साम टीव्ही

ठाण्यातून एक दु:खद बातमी समोर आली आहे. उपमुख्यमंत्री एकनाथ शिंदे यांच्या एस्कॉर्ट पथकात कार्यरत असलेले पोलीस उपनिरीक्षक विजय सागंडे (वय 57) यांचे उपचारादरम्यान निधन झाले आहे. मिळालेल्या माहितीनुसार, विजय सागंडे हे कामावर आल्यानंतर ठाण्यातील शासकीय विश्रामगृहात होते. यावेळी अचानक त्यांच्या छातीत दुखू लागले आणि त्यांना चक्कर आली. त्यानंतर त्यांना तातडीने जवळच्या रुग्णालयात दाखल करण्यात आले. मात्र उपचार सुरू असतानाच त्यांचा मृत्यू झाला.

विजय सागंडे हे गेल्या तीन वर्षांपासून उपमुख्यमंत्री एकनाथ शिंदे यांच्या एस्कॉर्ट पथकात कार्यरत होते. ते डोंबिवलीतील पलावा सिटी परिसरात आपल्या कुटुंबासोबत राहत होते. त्यांच्या निधनाची माहिती समोर आल्यानंतर पोलीस दलात हळहळ व्यक्त केली जात आहे. सागंडे यांचे पार्थिव त्यांच्या मूळ गावी नेण्यात येणार असल्याची माहिती समोर आली आहे.

त्यांच्या निधनानंतर पोलिसांकडून त्यांना बंदुकीच्या तोफेतून अखेरची सलामी देत शासकीय इतमामात अखेरचा निरोप देण्यात आला. ठाण्यातील सिव्हिल रुग्णालय परिसरात ठाणे पोलिस आयुक्तालयाकडून मानवंदना आणि श्रद्धांजली वाहण्यात आली. यावेळी पोलिस अधिकारी उपस्थित होते.