कल्याण : मुंबईमध्ये अनेक वेळा रेल्वे अपघाताच्या (Railway Accident) घटना घडत असतात. मात्र, त्याचवेळी रेल्वे पोलिसांच्या सतर्कतेमुळे अनेक अपघातांमधून लोकांना जीवदान मिळाल्याच्या बातम्या देखील आपण वाचत, ऐकत असतो. असाच एक प्रकार मंगळवारी सकाळी दहाच्या सुमारास घडला आहे.

मंगळवारी सकाळी दहाच्या दरम्यान येणारी दुरंतो एक्सप्रेस मेल कल्याण रेल्वे स्थानकात (Kalyan Railway Station) फलाट क्रमांक पाचवर आली असता. सीएसटी (CSMT) स्टेशनपर्यंत जाणारी महिला कल्याण स्टेशनलाच सीएसटी स्टेशन समजून कल्याणमध्ये उतरल्या मात्र, त्या महिलेला त्यांच्या सोबत असणारे आपले पती खाली न उतरल्याचं समजताच त्यांनी पुन्हा गाडीमध्ये चढण्याचा प्रयत्न केला.

दरम्यान, गाडीमध्ये चढत असताना त्यांचा तोल गेल्याने त्या फलाटावर पडल्या आणि त्या गाडी खाली जात असतानाच कल्याण रेल्वे स्टेशनवर असलेल्या महिला सहपोलीस फौजदार डोमाडे, महिला पोलिस नाईक गव्हाणे, महिला पोलीस नाईक काटकर यांनी तत्काळ विलंब न करता गाडी खाली जात असलेल्या महिलेस बाहेर ओढून काढले आणि त्यांचा जीव वाचवला. पोलिसांच्या या सतर्कतेमुळे सर्वच स्तरातून कौतुक करण्यात येत आहे.

नंद राम मोर्या असं या महिलेचं नाव असून मेलमधून प्रवाशाने चेन खेचून गाडी थांबवण्यात आली आणि मोर्या यांच्या पतीची भेट घालून त्यांना सीएसटीकडे रवाना करण्यात आलं. यावेळी वयस्कर मोर्या पती-पत्नीने पोलिसांचे आभार मानले.

Edited By - Jagdish Patil