पालघर : राज्यात अपघाताची मालिका सुरूच आहे. पालघरमध्येही भीषण अपघाताची घटना घडली. मुंबई-अहमदाबाद महामार्गावर अज्ञात वाहनाने चिरडल्याने तिघांचा जागीच मृत्यू झाला आहे. या भीषण अपघातानंतर महामार्गावर अनेकांची एकच धावाधाव झाली. यात तिघांच्या मृतदेहाचा चेंदामेंदा झाला.

मिळालेल्या माहितीनुसार, मुंबई-अहमदाबाद राष्ट्रीय महामार्गावरील ढेकाळे येथील वाघोबा खिंड परिसरात भीषण अपघाताची घटना घडली. अज्ञात वाहनाने दुचाकीला जोरदार धडक दिल्याने दुचाकीवरील तिघांचा जागीच मृत्यू झाला. या घटनेची माहिती मिळताच महामार्ग पोलीस तत्काळ घटनास्थळी दाखल झाले आहेत. पंचनामा आणि पुढील कार्यवाही सुरू आहे.

अपघातामधील मृतांची ओळख पटवण्याचे काम सध्या सुरू आहे. मनोर पोलिसांनी मृतदेह ताब्यात घेत ग्रामीण रुग्णालयात हलवले आहेत. अपघात करून फरार झालेल्या अज्ञात वाहनाचा शोध घेण्यासाठी पोलिसांनी तपासाची चक्रे वेगाने फिरवली. पोलिसांनी या अपघाताचा पुढील तपास सुरू आहे.

अपघातात मृतदेहाचा चेंदामेंदा

मुंबई-अहमदाबाद महामार्गावर अज्ञात वाहनाने तिघांना जोरदार धडक दिली. तिघांना चिरडल्यानंतर अज्ञात वाहनधारकांनी घटनास्थळावरून पळ काढला. यात तिघांच्या मृतदेहाचा चेंदामेंदा झाला. या अपघाताची माहिती मिळताच पोलिसांनी घटनास्थळी धाव घेतली. त्यानंतर तिघांचे पोलिसांनी ताब्यात घेत रुग्णालयात पाठवले. तिघांच्या मृत्यूने परिसरात हळहळ व्यक्त केली जात आहे.