सध्या देशभरात नवरात्रीचा सण मोठ्या उत्साहात आणि आनंदात साजरा केला जात आहे. देवीच्या स्वागतासाठी सर्वत्र दांडिया आणि गरब्याची धूम पाहायला मिळत आहे. यादरम्यान, मुंबईची लाईफलाईन मानल्या जाणाऱ्या लोकल ट्रेनमधून नवरात्रीचा एक अत्यंत सुंदर व्हिडिओ सध्या सोशल मीडियावर तुफान व्हायरल होत आहे. मुंबईकरांचा प्रत्येक सण साजरा करण्याचा जोश नेहमीच वेगळा असतो,आणि या व्हिडिओने पुन्हा एकदा ते सिद्ध केले आहे.

व्हायरल झालेल्या या व्हिडिओमध्ये, मुंबई लोकल ट्रेनच्या डब्यात काही महिलांनी एकत्र येत गरब्याचा आनंद लुटल्याचे दिसून येत आहे. विशेष म्हणजे, या सर्व महिलांनी नवरात्रीच्या रंगाशी सुसंगत अशा सुंदर लाल रंगाच्या साड्या आणि पारंपरिक पोशाख परिधान केला आहे. ट्रेनच्या डब्यात गाजणाऱ्या 'पावागड वाली माने दर्शन दे' या लोकप्रिय गुजराती भक्तीगीताच्या तालावर या महिलांनी धरलेला ठेका पाहण्यासारखा आहे.

लोकल ट्रेनच्या गर्दीत आणि धावपळीच्या वातावरणातही सणाचा आनंद कसा साजरा करावा, याचे उत्तम उदाहरण या महिलांनी घालून दिले आहे. हा व्हिडिओ इन्स्टाग्राम आणि एक्स यांसारख्या सोशल मीडिया प्लॅटफॉर्मवर मोठ्या प्रमाणावर शेअर केला जात आहे. नेटकऱ्यांकडून या व्हिडिओवर लाइक्स आणि कमेंट्सचा वर्षाव होत आहेत.

नवरात्रीच्या या नऊ दिवसांत मुंबईच्या लोकल ट्रेन असोत वा चाळी, प्रत्येक कोपऱ्यात देवीच्या भक्तीचा आणि संस्कृतीचा हा अनोखा उत्साह पाहायला मिळतोय, ज्याने उपनगरीय प्रवासाचा हा प्रवास अधिकच रंगतदार बनवला आहे.