नवी मुंबईतील तळोजा सेक्टर १० परिसरात मंगळवारी सकाळी एक भीषण हिट अँड रनची घटना घडली. भरधाव वेगाने धावणाऱ्या इलेक्ट्रिक XEV कारवरील चालकाचे नियंत्रण सुटल्याने वाहनाने रस्त्यावरील नागरिकांसह अनेक वाहनांना जोरदार धडक दिली. या अपघातात दोन जणांचा जागीच मृत्यू झाला असून आठ जण गंभीर जखमी झाले आहेत. या घटनेमुळे संपूर्ण परिसरात भीती आणि संतापाचे वातावरण निर्माण झाले आहे.

मिळालेल्या माहितीनुसार, नवी मुंबईतील तळोजा सेक्टर १० परिसरात आज सकाळच्या सुमारास इलेक्ट्रिक XEV कार भरधाव वेगात जात होती. भरधाव वेगात असणाऱ्या या कारने रस्त्यावरील ५ वाहनांना जोरदार धडक दिली. धडक इतकी भीषण होती की गाड्यांचा चक्काचूर झाला. या दुर्घटनेत २ जणांचा जागीच मृत्यू झाला. अपघातानंतर परिसरात एकच गोंधळ उडाला.

घटनेची माहिती मिळताच स्थानिक नागरिकांनी तातडीने बचावकार्य सुरू केले. जखमींना त्वरित जवळील खासगी रुग्णालयात उपचारासाठी दाखल करण्यात आले. दरम्यान, अपघात घडल्यानंतर कारचालकाने वाहन घटनास्थळीच सोडून पळ काढल्याचे समोर आले आहे. पोलिसांनी घटनास्थळी पोहोचून पंचनामा सुरू केला असून परिसरातील सीसीटीव्ही फुटेज आणि प्रत्यक्षदर्शींच्या मदतीने फरार चालकाचा शोध घेतला जात आहे.

या भीषण अपघाताचे काही व्हिडिओ सोशल मीडियावर व्हायरल झाले आहेत. या घटनेनंतर स्थानिक नागरिकांनी परिसरातील वाहतूक सुरक्षिततेबाबत चिंता व्यक्त केली असून दोषी चालकावर कठोर कारवाई करण्याची मागणी केली आहे. तळोज्यातील या दुर्घटनेमुळे नागरिकांमध्ये भीतीचे वातावरण निर्माण झाले असून पोलिस तपासानंतर या अपघातामागील नेमके कारण स्पष्ट होणार आहे.