Summary -

• नवी मुंबईतील ऐरोलीमध्ये गोळीबाराची घटना

• सामाजिक कार्यकर्त्यावर गोळ्या झाडल्या

• या गोळीबारात दोघे जण जखमी झाले

• पोलिसांनी गुन्हा दाखल करत तपास सुरू केला

विकास मिरगणे, नवी मुंबई

नवी मुंबईत गोळीबाराची घटना घडली. ऐरोलीमध्ये सामाजिक कार्यकर्त्यावर गोळ्या झाडण्यात आल्या. या गोळीबारामध्ये दोघे जण गंभीर जखमी झाले असून त्यांच्यावर सध्या रुग्णालयात उपचार सुरू आहेत. या घटनेमुळे ऐरोलीमध्ये खळबळ उडाली आहे. घटनेची माहिती मिळताच पोलिसांनी घटनास्थळी धाव घेतली. या प्रकरणी पोलिसांनी गुन्हा दाखल करत तपास सुरू केला आहे.

मिळालेल्या माहितीनुसार, ऐरोली परिसरातील साईनाथ वाडीमधील छत्रपती चाळीमध्ये ही घटना घडली. गोळीबाराच्या या घटनेमुळे परिसर हादरून गेला. गोळीबाराचा आवाज ऐकून नागरिक घाबरले. सध्या ऐरोलीमध्ये गोंधळाचे वातावरण आहे. या गोळीबाराच्या घटनेत सामाजिक कार्यकर्ते संदीप गवस आणि अमित मोर्या हे जखमी झाले आहेत. स्थानिक नागरिकांनी त्यांना जखमी अवस्थेत रुग्णालयात दाखल केले.

पोलिसांनी सांगितले की, मोटरसायकलवरून आलेल्या एका अज्ञात हल्लेखोराने अचानक बंदुकीतून तीन राऊंड फायर केले. सामाजिक कार्यकर्त्याच्या दिशेने त्याने गोळीबार केला होता. सामाजिक कार्यकर्ता आणि आणखी एकाच्या शरीरात गोळ्या घुसल्या. या गोळीबारात दोघे जखमी झाले असून त्यांच्यावर रुग्णालयात उपचार सुरू आहेत. गोळीबारानंतर आरोपी घटनास्थळावरून फरार झाला.

घटनेची माहिती मिळताच रबाळे पोलिसांनी तात्काळ घटनास्थळी धाव घेतली. आरोपीचा शोध घेण्यासाठी पोलिस सीसीटीव्ही फुटेज तपासत आहेत. या गोळीबार प्रकरणाचा तपास करण्यासाठी पोलिसांनी विशेष पथके तयार केली आहेत. या घटनेमुळे सध्या ऐरोलीमध्ये भीतीचे वातावरण आहे. हा गोळीबारा नेमका कोणत्या कारणामुळे करण्यात आला होता याचा तपास पोलिस करत आहेत.