Summary -

• नवी मुंबईतील कोपरखैराणे येथे अल्पवयीन मुलीवर अत्याचाराची घटना

• आरोपी वडिलाविरोधात पोक्सो कायद्यांतर्गत गुन्हा दाखल

• मुलीची आई मूकबधिर असून तज्ज्ञांच्या मदतीने निवेदन घेतले

• आरोपी फरार असून पोलिसांनी शोधमोहीम सुरू केली

बापाने आपल्या ९ वर्षांच्या मुलीवर लैंगिक अत्याचार केल्याची धक्कादायक घटना नवी मुंबईत घडली. मुलीला अश्लिल व्हिडीओ दाखवत आरोपी तिच्यासोबत अश्लिल चाळे करायचा. हा प्रकार मुलीच्या आईच्या लक्षात येताच तिने पोलिस ठाण्यात धाव घेत तक्रार दाखल केली. घटनेचे गांभीर्य लक्षात घेऊन पोलिसांनी बापाविरोधात पोक्सो कायद्यांतर्गत गुन्हा दाखल केला. आरोपी फरार असून पोलिस त्याचा शोध घेत आहेत.

मिळालेल्या माहितीनुसार, ही घटना नवी मुंबईच्या कोपरखैराणे येथे घडली. याठिकाणी आरोपी बायको आणि मुलीसोबत राहते. आरोपी मुलीला अश्लील व्हिडीओ दाखवून तिच्यावर लैंगिक अत्याचार करत होता. पीडित मुलीच्या आईच्या लक्षात ही बाब आली. पण मुलीची आई मूकबधिर असल्यामुळे ती काय बोलते हे पोलिसांना समजत नव्हते. पोलिसांनी तज्ज्ञांच्या मदतीने महिलेशी संवांद साधला आणि या प्रकरणाची नोंद करून घेत आरोपीविरोधात गुन्हा दाखल केला.

वडिलांच्या या कृत्यामुळे मुलगी प्रचंड घाबरली होती. आई घरामध्ये नसल्यावर आरोपी तिच्यावर लैंगिक अत्याचार करत होता. सुदैवाने मुलीसोबत घडलेला प्रकार आईच्या लक्षात आल्यामुळे तिने वेळीच पोलिस ठाणे गाठले. महिलेने पोलिसांना सांगितले की, आरोपी नवऱ्याने यापूर्वीही तिच्यावर अत्याचार करण्याचा आणि हल्ला करण्याचा प्रयत्न केला होता. या गुन्ह्यानंतर आरोपी फरार झाला असून पोलिस त्याचा शोध घेत आहेत. या घटनेमुळे नवी मुंबईत खळबळ उडाली.