विकास मिरगणे, साम टीव्ही

नवी मुंबई: कामोठे परिसरात एका गृहनिर्माण सोसायटीमध्ये माणुसकीला काळिमा फासणारी घटना घडली आहे. एका सोसायटीतील वॉचमनने तीन अल्पवयीन मुलींशी गैरवर्तन केल्याचा धक्कादायक प्रकार समोर आला आहे. विशेष म्हणजे शाळेत मिळालेल्या 'गुड टच-बॅड टच'च्या माहितीमुळे या मुलींना आपल्यासोबत काहीतरी चुकीचे घडत असल्याची जाणीव झाली आणि हा प्रकार उघडकीस आला.

संबंधित पीडित मुलींच्या शाळेत विद्यार्थिनींसाठी 'गुड टच' आणि 'बॅड टच' या विषयावर जनजागृती सत्र आयोजित करण्यात आले होते. या सत्रादरम्यान शिक्षकांनी दिलेल्या माहितीनंतर एका मुलीने तिच्यासोबत घडलेला प्रसंग शिक्षकांना सांगितला. मुलीने दिलेल्या माहितीमुळे शिक्षकही थक्क झाले. त्यांनी तातडीने पालकांशी संपर्क साधून घटनेचे गांभीर्य लक्षात आणून दिले.

पोलिसांची कारवाई आणि सीसीटीव्ही पुरावा

पालकांनी या प्रकरणी कामोठे पोलीस ठाण्यात धाव घेत तक्रार दाखल केली. पोलिसांनी घटनेचे गांभीर्य ओळखून सोसायटीतील सीसीटीव्ही फुटेजची तपासणी केली. यामध्ये आरोपी वॉचमनचे गैरवर्तन स्पष्टपणे दिसून आले. या पुराव्याच्या आधारे पोलिसांनी तात्काळ कारवाई करत आरोपी वॉचमनला बेड्या ठोकल्या आहेत.

या प्रकरणावर बोलताना सहाय्यक पोलीस आयुक्त प्रेरणा कट्टे यांनी सांगितले की, "अल्पवयीन मुलींच्या सुरक्षेबाबत पोलीस प्रशासन अत्यंत संवेदनशील आहे. या प्रकरणात गुन्हा दाखल करून आरोपीला अटक करण्यात आली आहे. अशा नराधमांविरोधात कठोर कायदेशीर कारवाई केली जाईल."