महाराष्ट्र सरकारच्या विनंतीवरून रेल्वे मंत्रालयाने स्थानकाचे नाव बदलून सीवूड्स-दारावे-करावे असे करण्यात आले आहे. तर नव्या स्थानकाचा कोड SWDK असा असणार आहे. रेल्वे अधिकाऱ्यांनी नाव बदलण्याची माहिती देताना सांगितले की, स्थानिक भाग लक्षात घेऊन हे नामकरण करण्यात आलंय. "सीवूड्स" हे नाव जवळच्या गृहनिर्माण संस्थेला सूचित करते, तर "दारावे" आणि "करावे" ही जवळच्या दोन गावांची नावे आहेत. यामुळे स्टेशनच्या नावात तिन्ही प्रमुख ठिकाणे समाविष्ट करण्यात आली आहेत.

या स्टेशनचा कोडदेखील बदलण्यात आला आहे. मध्य रेल्वेच्या प्रवक्त्याने याची पुष्टी केली. नाव बदलण्याआधी स्टेशनचा कोड SWDV होता. तर प्रवक्त्याच्या मते, हा कोड आता SWDK मध्ये बदलण्यात आलाय. नवी मुंबईतील स्टेशनच्या नाव बदलण्याचा प्रशासकीय निर्णय तात्काळ लागू करण्यात आलाय. त्यामुळे नवीन नाव आणि कोड स्टेशन साइनबोर्ड आणि रेल्वे सूचीमध्ये समाविष्ट केलं जाणार आहे.

महापरिनिर्वाण दिनानिमित्त १२ अतिरिक्त उपनगरी विशेष सेवा

भारतरत्न डॉ. बाबासाहेब आंबेडकर यांच्या महापरिनिर्वाण दिन २०२५ निमित्त मध्य रेल्वे प्रवाशांच्या सुविधेसाठी ५/६.१२.२०२५ (शुक्रवार – शनिवार)च्या मध्यरात्री परळ– कल्याण आणि कुर्ला – वाशी/पनवेल दरम्यान १२ अतिरिक्त उपनगरी विशेष गाड्या चालवणार आहे. या उपनगरी विशेष गाड्या सर्व स्थानकांवर थांबा देतील.