Mumbra News: मुंब्रा येथील डोंगरे नगर, किस्मत कॉलनी परिसरात एका ११ वर्षीय मुलाचा विजेचा झटका लागून मृत्यू झाल्याची धक्कादायक घटना घडली आहे. सुहेल फिरोज खान (११) असे मृत्यू झालेल्या मुलाचे नाव असून तो अमिनाबाद, चांदनगर येथील रहिवासी आहे. मुलाच्या मृत्यूसाठी स्थानिक लोक टॉरंट पॉवरला जबाबदार धरत आहेत.

याबाबत अधिक माहिती अशी की, मयत मुलगा हा संध्याकाळच्या सुमारास कादरी मशिदी येथे नमाजसाठी आला होता. त्याच दरम्यान मशिदीच्या गेटमध्ये करंट आला आणि त्याला विजेचा झटका लागल्याने त्याचा मृत्यू झाला. नमाज झाल्यानंतर जेव्हा सर्व लोक बाहेर आले त्यानंतर हा मुलगा खाली पडल्याचे लोकांना दिसून आले.

स्थानिकांनी त्याला तात्काळ प्राइम हॉस्पिटलमध्ये भरती केले मात्र तेथील डॉक्टरांनी त्याला मृत्यू घोषित केले. यावर स्थानिकांनी टोरंट पॉवरवर आरोप करत रस्त्यावर, जमिनीच्या विद्युत वाहिन्या उघड्यावर पडल्या असून त्या अंडरग्राउंड केल्या गेलेल्या नाही, ते धोकादायक ठरू शकत असल्याचे म्हणले आहे.

दरम्यान, या घटनेमुळे मुंब्रा परिसरात शोककळा पसरली असून सुहेलच्या कुटुंबियांवर दु:खाचा डोंगर कोसळला आहे. या बाबत मुंब्रा पोलिसांना माहिती मिळाली असता मुंब्रा पोलिसांनी घटनास्थळी पोहोचून मृतदेह ताब्यात घेत शवविच्छेदनासाठी पाठवला असल्याचे स्थानिकांनी सांगितले. (Latest Marathi News)