Summary in Marathi (4 Pointers)

• कांदिवली पूर्व मिस्त्री चाळीत सिलिंडर स्फोटामुळे ३ महिलांचा मृत्यू झाला.

• शिवानी केटरिंग युनिटमध्ये झालेल्या या दुर्घटनेत ७ जण जखमी झाले.

• मृत महिलांवर उपचारादरम्यान प्राण गमवावे लागले.

• केटरिंग युनिटकडे आवश्यक अग्निशमन परवानग्या नव्हत्या, तपास सुरू आहे.

कांदिवलीमध्ये एका केटरिंग युनिटमध्ये बुधावारी अग्नितांडव झाले. गॅसचा स्फोट होऊन लागलेल्या आगीत सात जण गंभीर जखमी झाले होते. यामधील तिघांचा रविवारी उपचारादरम्यान मृत्यू झाला. तर इतर जखमींवर सध्या वेगवेगळ्या रुग्णालयात उपचार सुरू आहेत. गॅस सिलिंडरमधून गळती होत असताना देखील तसेच काम सुरु ठेवल्यामुळे ही भयंकर घटना घडली.

या दुर्घटनेत मृत्यू झालेल्या रक्षा जोशी ज्या ८५ ते ९० टक्के भाजल्या होत्या. त्यांच्यावर कस्तुरबा रुग्णालयात उपचार सुरू होते. नितू गुप्ता (३१ वर्षे) या ८० टक्के भाजल्या होत्या आणि पूनम (२८ वर्षे) या ९० टक्के भाजल्या होत्या. या दोघींवर एरोली बर्न हॉस्पिटलमध्ये उपचार सुरू होते. या दोघींचा देखील उपचारादरम्यान मृत्यू झाला. या तिघीही कॅटरिंगमध्ये काम करत होत्या.

कांदिवली पूर्व येथील मिस्त्री चाळीमध्ये असणाऱ्या शिवानी केटरिंगमध्ये बुधवारी सकाळी ९ वाजताच्या सुमारास गॅस लिकेज होऊन सिलिंडरचा स्फोट झाला. त्यानंतर भीषण आग लागून ७ जण जखमी झाले होते. या घटनेमुळे एकच खळबळ उडाली होती. घटनेची माहिती मिळताच अग्निशमन दलाच्या जवानांनी घटनास्थळी धाव घेतली. जखमी झालेल्या सर्वांना तात्काळ स्थानिकांच्या मदतीने रुग्णालयामध्ये उपचारासाठी दाखल करण्यात आले होते. त्यानंतर अग्निशमन दलाने आग अटोक्यात आणली होती.

जखमींमधील सर्वांची प्रकृती गंभीर होती. जखमींमधील तिघांचा मृत्यू झाला. तर सध्या शिवानी गांधी (५१ वर्षे), जानकी गुप्ता (३९ वर्षे), मनराम कुमकट (५५ वर्षे) आणि दुर्गा गुप्ता (३० वर्षे) या सर्व जखमींची प्रकृती गंभीर आहे. त्यांच्यावर देखील रुग्णालयात उपचार सुरू आहेत.

अग्निशमन दलाच्या अधिकाऱ्यांनी सांगितले की, या केटरिंगमध्ये असलेल्या एका गॅस सिलिंडरमधून बराच काळ गॅस गळती होत होती. परंतु केटरिंग युनिटच्या लोकांनी गॅस सिलिंडर उलटा करून तो पाण्याने भरलेल्या टबमध्ये टाकला आणि त्यांचे काम सुरू ठेवले आणि ही घटना घडली. चाळीत केटरिंग बिझनेस चालविण्यासाठी या केटरिंग युनिटकडे आवश्यक अग्निशमन परवानग्या नव्हत्या.