Mumbai Amritsar Express : मोठी दुर्घटना टळली! डहाणूजवळ एक्सप्रेसचे २ डब्बे निखळले; प्रवाशांमध्ये भीतीचं वातावरण

राज्यात एकीकडे मुसळधार पाऊस सुरु असताना दुसरीकडे मुंबईहून अमृतसरकडे निघालेल्या अमृतसर सुपरफास्ट एक्सप्रेसचे पश्चिम रेल्वेच्या डहाणू रेल्वे स्थानकाजवळ दोन डबे निघाल्याची घटना समोर आली आहे. आज दुपारी १ वाजताच्या सुमारास ही घटना घडली असून अमृतसरकडे जाताना डहाणू जवळ हे दोन डबे निघाले आहेत. यामुळे प्रवाशांमध्ये भीतीच वातावरण पसरल्याचं पाहायला मिळालं .

मिळालेल्या माहितीनुसार, अमृतसर सुपरफास्ट एक्सप्रेस ही मुंबईहून अमृतसरकडे निघाली होती. या दरम्यान या गाडीचे दोन डबे निघाले. मुंबई उपनगर ठाणे आणि पालघर या भागांमध्ये आधीच मुसळधार पावसामुळे रेल्वे वाहतूक विस्कळीत झाल्याचं पाहायला मिळालं त्यातच पश्चिम रेल्वेचा हा निष्काळजीपणा पुन्हा एकदा समोर आला आहे. या घटनेने प्रवाशांमध्ये भीतीचं वातावरण निर्माण झालं होत.

सुदैवाने या घटनेनंतर मोठी दुर्घटना टळली असली तरी याचा थेट परिणाम डहाणूपर्यंत धावणाऱ्या लोकल आणि लांब पल्ल्यांच्या गाड्यांवर झाल्याचा पाहायला मिळालं . डाऊन मार्गावरील गाड्या तब्बल ४० मिनिटं रोखण्यात आल्या. यानंतर हे डबे पुन्हा एकदा जोडून अमृतसर एक्सप्रेस गुजरातकडे रवाना करण्यात आली.

मुंबईत काल पासून मुसळधार पावसाला सुरुवात झाली आहे. मुंबई, ठाणे, कल्याण, पालघरसह नवीमुंबईला रेड अलर्ट जरी करण्यात आला आहे. प्रशासनाने गरज असेल तरच घराबाहेर पडा अशी सूचना नागरिकांना दिली आहे. दरम्यान हवामान खात्याने पुढील काही दिवस पावसाचा जोर असाच कायम राहणार असल्याचं म्हटलं आहे.