राज्यात महापालिका निवडणुकीच्या प्रचाराची रणधुमाळी सुरू आहे. या निवडणुकीदरम्यान काही ठिकाणी गालबोल लागण्याच्या घटना घडत आहेत. सोलापूर आणि अकोल्यात हत्येच्या घटना घडल्या आहेत. छत्रपती संभाजीनगरमध्ये आज इम्तियाज जलील यांच्यावर हल्ला झाला. त्यानंतर आता आशियातील सर्वात श्रीमंत महापालिका असलेल्या मुंबईत शिंदे गटाच्या उमेदवाराच्या पोटात चाकू भोसकल्याची घटना घडली आहे. या हल्ल्याने संपूर्ण मुंबईत खळबळ उडाली आहे.

मिळालेल्या माहितीनुसार, शिंदे गटाचे उमेदवार हाजी सालीन कुरेशी यांच्यावर जीवघेणा झाल्याची घटना घडली आहे. वांद्रे येथील ज्ञानेश्वरनगरात प्रचारादरम्यान हा प्रकार घडला. अज्ञात व्यक्तीने पोटात चाकू भोसकल्याने घटनास्थळी एकच खळबळ उडाली. या हल्ल्यानंतर त्यांना तातडीने महात्मा गांधी रुग्णालयात दाखल करण्यात आल्याची माहिती मिळत आहे. राजकीय व्यक्तीवर हल्ले होऊ लागल्याने चिंता व्यक्त केली जात आहे.

शिंदे गटाच्या उमेदवार नेमका कोणी हल्ला केला, याची नावे समोर आलेली नाही. हल्ल्याचे कारणही अद्याप अस्पष्ट आहे. पोलिसांनी या प्रकरणी तपासाला सुरुवात केली आहे. पोलिसांकडून गुन्हा दाखल करण्याची प्रक्रिया सुरू केली आहे.

कोण आहेत हाजी सलीम कुरेशी?

हाजी सलीम कुरेशी हे शिंदे गटाचे नेते आहेत. ते याआधी एमआयएम पक्षात कार्यरत होते. पालिका निवडणुकीच्या पार्श्वभूमीवर त्यांनी शिंदे गटात प्रवेश केला. शिंदेंनी त्यांना उमेदवारी जाहीर केली.

तत्पूर्वी, राज्यात गेल्या काही दिवसांपासून निवडणुकीला गालबोट लागल्याच्या घटना घडल्या आहेत. सोलापूरमध्ये काही दिवसांपूर्वी मनसेच्या बाळासाहेब सरवदे यांची हत्या झाली. तर अकोल्यात काल काँग्रेस नेते हिदायत पटेल यांची हत्या झाली. तर आज सकाळी छत्रपती संभाजीनगरमध्ये माजी खासदार इम्तियाज जलील यांच्यावर हल्ला झाला. एमआयएमच्या नाराज कार्यकर्त्यांनी जलील यांना मारहाण आणि हल्ला केला. या घटनेने परिसरात एकच खळबळ उडाल्याचं पाहायला मिळालं.