भाजप-शिवसेना आमनेसामने; शिंदेसेनेच्या 4 नगरसेवकांवर अपात्रतेची टांगती तलवार, राजकीय वर्तुळात खळबळ

अक्षय गवळी, साम प्रतिनिधी

महायुतीमध्ये आधीच विधानपरिषद आणि जिल्हा बँकेच्या निवडणुकीवरून तणावाचे वातावरण असताना अकोल्यात शिवसेना-भाजप आमनेसामने आलेत.अकोला जिल्ह्यातील हिवरखेड नगरपरिषदेत मोठी राजकीय घडामोड घडलीय. शिवसेना शिंदे गटाच्या ४ नगरसेवकांना अपात्र करण्याबाबतचा ठराव विशेष सभेत बहुमताने मंजूर करण्यात आलाय.

१५ विरुद्ध ५ अशा मतांनी हा ठराव पारित झाल्याने शिंदेसेनेच्या नगरसेवकांवर आता अपात्रतेची टांगती तलवार लटकलीय. महायुतीत वाद सुरू असतानाच भाजपकडून शिवसेनेला हा आणखी एक राजकीय धक्का मानला जातोय.

हिवरखेड नगरपरिषदेत शिवसेना शिंदे गटाचे एकूण पाच नगरसेवक निवडून आले आहेत. त्यापैकी रवी घुंगड, ऋषिकेश पंचबुद्धे, रामेश्वर हागे आणि श्यामशील भोपळे या चार नगरसेवकांविरोधात भाजपच्या १२ नगरसेवकांनी अपात्रतेचा प्रस्ताव दाखल केला होता. या प्रस्तावावर निर्णय घेण्यासाठी आज विशेष सभा आयोजित करण्यात आली होती.

या विशेष सभेत हात वर करून मतदान घेण्यात आले. यावेळी ठरावाच्या बाजूने १५ मते पडली, तर विरोधात ५ मते मिळाली. त्यामुळे १५ विरुद्ध ५ अशा बहुमताने चार नगरसेवकांना अपात्र करण्यासंदर्भातील ठराव मंजूर करण्यात आला.

महायुतीत पुन्हा संघर्षाची ठिणगी?

एकीकडे राज्यात भाजप, शिवसेना शिंदे गट आणि राष्ट्रवादी काँग्रेस महायुती म्हणून सत्तेत एकत्र आहेत. मात्र, स्थानिक स्वराज्य संस्थांमधील राजकीय समीकरणांवरून महायुतीतील मतभेद वारंवार समोर येत आहेत. विधानपरिषद आणि जिल्हा बँकेच्या निवडणुकीवरून आधीच तणाव निर्माण झालेला असताना हिवरखेडमधील या घडामोडीमुळे भाजप आणि शिंदेसेनेतील स्थानिक राजकीय संघर्ष पुन्हा चर्चेत आला आहे.

नगपालिकेच्या विशेष सभेत ठराव मंजूर झाला असला तरी संबंधित चार नगरसेवक प्रत्यक्षात अपात्र ठरले आहेत का, याबाबतचा अंतिम निर्णय आणि पुढील अधिकृत प्रक्रिया महत्त्वाची ठरणार आहे. त्यामुळे या प्रकरणात पुढे काय घडते, याकडे राजकीय वर्तुळाचे लक्ष लागले आहे.