साक्षी यादव, मुंबई

मुंबईतील राम मंदिर परिसरातून धक्कादायक घटना समोर आली आहे. राम मंदिर (पूर्व) परिसरात सार्वजनिक शौचालयातून बाहेर पडलेल्या रासायनिक वायूमुळे २ जणांचा गुदमरून मृत्यू झाला. मृणालताई ब्रिजजवळ, पारसी पंचायत गेटसमोर असलेल्या सार्वजनिक शौचालयात ही घटना घडली. या घटनेनंतर परिसरात काही काळ खळबळ उडाली असून, नेमक्या कोणत्या रसायनामुळे हा प्रकार घडला, याचा तपास सुरू आहे.

स्थानिक नागरिकांच्या माहितीनुसार, सार्वजनिक शौचालयातून अचानक तीव्र आणि घाणेरडा रासायनिक वास येत असल्याचे जाणवले. या वासामुळे शौचालयाच्या परिसरात गेलेल्या दोन जणांना गुदमरल्यासारखा त्रास होऊ लागला. प्राथमिक माहितीनुसार, रासायनिक वासाचा परिणाम झाल्याने दोघांची प्रकृती बिघडली.

घटनेची माहिती मिळताच संबंधित यंत्रणांनी तातडीने घटनास्थळी धाव घेतली. BMC अग्निशमन दल, पोलीस, 108 रुग्णवाहिका तसेच महाराष्ट्र प्रदूषण नियंत्रण मंडळाचे (MPCB) अधिकारी आणि पालिका कर्मचाऱ्यांनी घटनास्थळी पोहोचून परिस्थितीचा आढावा घेतला. परिसर सुरक्षित करण्यासाठी तसेच संभाव्य रासायनिक धोका तपासण्यासाठी आवश्यक कार्यवाही करण्यात आली.

दोन्ही तरुणांना तातडीने उपचारासाठी ट्रॉमा केअर रुग्णालयात दाखल करण्यात आले. मात्र, डॉक्टरांनी पहाटे 3.49 वाजता दोघांनाही मृत घोषित केले. मृतांची नावे प्रभाकर धनिवार (24) आणि भाविन देसाई (18) अशी आहेत. दरम्यान, या दुर्घटनेमागे नेमके कोणते रसायन कारणीभूत ठरले, सार्वजनिक शौचालयात हे रसायन कसे आले आणि दोन्ही तरुणांच्या मृत्यूचे नेमके वैद्यकीय कारण काय, याबाबत अद्याप अधिकृत माहिती समोर आलेली नाही. संबंधित यंत्रणांकडून घटनास्थळाची पाहणी करून परिस्थितीची तपासणी केली जात आहे. पोलिसांकडूनही या प्रकरणाचा तपास सुरू आहे.