मुंबईकरांसाठी महत्वाची बातमी आहे. मुंबईतील २ भागांमध्ये उद्या पाणीपुरवठा बंद राहणार आहे. मुंबई महानगर पालिकेच्या एच पश्चिम विभागातील पाली हिल जलाशय १ च्या जुन्या आणि जीर्ण झालेल्या मुख्य जलवाहिनींच्या दुरूस्तीचे काम पालिका प्रशासन करणार आहे. या कामामुळेच उद्या वांद्रे आणि खार परिसरातील काही भागांमध्ये पाणीपुरवठा बंद राहणार आहे. त्यामुळे नागरिकांनी पाणी साठवून ठेवावे आणि त्याचा जपून वापर करावा असे आवाहन करण्यात आले आहे.

मुंबई महापालिकेने एच पश्चिम विभागातील पाणीपुरवठ्यात सुधारणा करण्याची कामं हाती घेतली आहे. या कामाअंतर्गत पाली हिल जलायश १ ची जीर्ण आणि जुन्या झालेल्या जलवाहिन्यांची दुरस्ती केली जाणार आहे. त्याचसोबत वांद्रे पश्चिम येथील आर. के. पाटकर मार्गावर रामदास नाईक मार्ग ते मार्ग क्रमांक 32 दरम्यान नव्याने टाकलेल्या 750 मिलिमीटर व्यासाची मुख्य जलवाहिनी कार्यान्वित करण्यात येणार आहे.

ही दोन्ही कामं उद्या म्हणजेच ३० ऑगस्ट रोजी सकाळी १० वाजल्यापासून ते रात्री १२ वाजेपर्यंत केली जाणार आहेत. या कामांमुळे एच पश्चिम विभागातील काही भागांचा पाणीपुरवठा उद्या बंद राहणार आहे. एच पश्चिम विभागामध्ये राहणाऱ्या नागरिकांनी उद्या होणाऱ्या कामाची नोंद घेऊन पाण्याचा जपून वापर करावा आणि पाणी साठवून ठेवण्याचे आवाहन पालिकेकडून करण्यात आले आहे. जलवाहिनी दुरुस्तीचे काम पूर्ण झाल्यानंतर नियमित वेळेनुसार पाणीपुरवठा पूर्ववत केला जाणार आहे.

पेरी परिक्षेत्र -

वांद्रे पश्चिमचा काही भाग, वरोडा मार्ग, हिल रोड, मॅन्युअल गोन्सालविस मार्ग, पाली गावठाण, कांतवाडी, शेरली राजन मार्ग या भागातील पाणीपुरवठा उद्या बंद राहणार आहे.

खार दांडा परिक्षेत्र -

खार दांडा कोळीवाडा, दांडपाडा, चुइम गावठाण, खार पश्चिमेचा काही भाग, गझदरबंध झोपडपट्टीचा काही भाग या भागातील पाणीपुरवठा उद्या बंद राहणार आहे

डॉ. बाबासाहेब आंबेडकर मार्ग परिक्षेत्र -

डॉ. बाबासाहेब आंबेडकर मार्ग लगतचा परिसर, पेस पाली गावठाण, पाली पठार, खार पश्चिमेच्या काही भागातील पाणीपुरवठा उद्या बंद राहणार आहे.