Mumbai Police Death:

मुंबईमध्ये एका तरुण पोलिस कॉन्स्टेबलचा (Mumbai Police Constable) रस्ते अपघातामध्ये दुर्दैवी मृत्यू झाल्याची घटना समोर आली आहे. मुंबईतल्या एलफिन्स्टन ब्रिजवर (Elphinstone Bridge) पोलिसाच्या बाईकला अपघात झाला होता. या अपघातामध्ये पोलिसासह त्याचा मित्र गंभीर जखमी झाला होता. या दोघांवर रुग्णालयात उपचार सुरू होते. पण उपचारादरम्यान पोलिसाचा मृत्यू झाला. या अपघात प्रकरणाचा तपास भोईवाडा पोलिसांकडून सुरू आहे.

मिळालेल्या माहितीनुसार, गुरुवारी पहाटेच्या सुमारास एलफिन्स्टन ब्रिजवर एका अज्ञात वाहनाने पोलिस कॉन्स्टेबलच्या बाईकला धडक दिली होती. धनराज घाग असं या २५ वर्षीय कॉन्स्टेबलचे नाव होते. धनराज एल ए विभागात कार्यरत होते. या अपघातामध्ये धनराज यांच्यासह त्यांच्या बाईकवरून प्रवास करणारा मित्र देखील गंभीर जखमी झाला होता. त्यांना नजीकच्या रुग्णालयामध्ये उपचारासाठी दाखल करण्यात आले होते.

या अपघातामध्ये गंभीर जखमी झालेल्या धनराज आणि त्यांच्या मित्रावर रुग्णालयात उपचार सुरू होते. पण उपचारादरम्यान धनराज यांचा मृत्यू झाला. हा अपघात नेमका कसा झाला याची माहिती अद्याप समोर आली नाही. याप्रकरणी भोईवाडा पोलिसांनी अज्ञात वाहन चालकाविरोधात गुन्हा दाखल करत तपास सुरू केला आहे. धनराज घाग यांच्या मृत्यूमुळे त्यांच्या कुटुंबावर दु:खाचा डोंगर कोसळला आहे.