सचिन गाड, मुंबई

Mumbai: नैराश्येतून आत्महत्या करण्याच्या प्रयत्नात असलेल्या तरुणाचे प्राण वाचवण्यात मुंबई पोलिसांना यश आले आहे. महत्वाचे म्हणजे या प्रकरणात गुगलने महत्वाची भूमिका बजावली आहे. त्रास न होता मरण्याचे मार्ग असे या तरुणाने इंटरनेटवर सर्च केले.

ज्यानंतर गुगलकडून (Google) हालचाली झाल्या आणि मुंबई पोलिसांच्या मदतीने या २५ वर्षीय तरुणाचे प्राण वाचले आहेत. काय आहे हे संपूर्ण प्रकरण, चला जाणून घेवू...

याबाबत अधिक माहिती अशी की, संबंधित तरुण हा मुंबईमधील जोगेश्वरी मध्ये राहत असून तो आयटी इंंजिनिअर आहे. या तरुणाने मोठ्या प्रमाणावर शैक्षणिक कर्ज घेतले होते. मात्र ते फेडता येत नसल्याने तो प्रचंड निराश झाला होता. याच नैराश्येतून त्याने आत्महत्या करण्याचा निर्णय घेतला. यासाठी तो त्रास न होता मरण्याचे मार्ग असे इंटरनेटवर सर्च करत होता.

गुगलच्या हे लक्षात आल्यानंतर त्यांनी इंटरपोलच्या मदतीने त्याची माहिती मुंबई पोलिसांना दिली. मुंबई गुन्हे शाखेच्या कक्ष ५ ने तात्काळ पावले उचलत जोगेश्वरी वरून या तरुणाला अवघ्या दोन तासात शोधून काढले.

पोलिसांनी ताब्यात घेतल्यानंतर मुंबई पोलिसांच्या पथकाने या मुलाचे समुपदेशन केले आणि त्यानंतर त्याच्या आई वडिलांना बोलवून त्यांना देखील परिस्थितीची कल्पन देऊन मुलाला सुखरूप त्यांच्या ताब्यात देण्यात आले. धक्कादायक बाब म्हणजे या आधी दोन वेळ त्याने आत्महत्या करण्याचा प्रयत्न केला असल्याचे त्या तरुणाने पोलिसांना सांगितले.

मात्र पोलिसांच्या सतर्कतेमुळे आणि इंटरनेटच्या साहाय्याने या तरुणाचे प्राण वाचले. यावेळी मुंबई पोलीस (Mumbai Police) आयुक्त विवेक फणसाळकर यांनी देखील गुन्हे शाखा कक्ष ५ च्या टीमचे अभिनंदन केले आहे.