संजय गडदे, मुंबई प्रतिनिधी

Mumbai Crime News : माहीम परिसरात शाळा सुटल्यानंतर घरी जात असलेल्या एका अल्पवयीन मुलीला बाईकवरून निर्जनस्थळी नेऊन तिच्यावर लैंगिक अत्याचार केल्याचा धक्कादायक प्रकार समोर आला आहे. विशेष म्हणजे, आरोपीने या घटनेचे काही अश्लील फोटो व व्हिडिओ काढून ते सोशल मीडियावर व्हायरल करण्याची धमकी देत मुलीला गप्प राहण्यास भाग पाडल्याचे पोलिस तपासात समोर आले आहे. (Mahim minor girl assault POCSO case)

पीडित मुलगी आपल्या पालकांसोबत माहीम परिसरात राहत असून एका नामांकित शाळेत शिक्षण घेत आहे. १८ जून रोजी नेहमीप्रमाणे शाळा सुटल्यानंतर ती घरी जात होती. त्यावेळी आरोपी बाईकवरून तिच्याजवळ आला. त्याने मुलीला बाईकवर बसवून एका निर्जनस्थळी नेले. तेथे तिचे हातपाय बांधून तिच्यावर लैंगिक अत्याचार केल्याचा आरोप आहे. यावेळी आरोपीने काही फोटो व व्हिडिओही काढले.

त्यानंतर हे फोटो आणि व्हिडिओ सोशल मीडियावर व्हायरल करून बदनामी करण्याची धमकी आरोपीने मुलीला दिली. या धमकीमुळे घाबरलेल्या मुलीने काही काळ हा प्रकार कोणालाही सांगितला नाही.

घटनेनंतर मुलगी प्रचंड मानसिक तणावात होती. पालकांच्या निदर्शनास हा प्रकार आल्यानंतर त्यांनी तिची आपुलकीने चौकशी केली. त्यावेळी मुलीने घडलेला संपूर्ण प्रकार पालकांना सांगितला. त्यानंतर पालकांनी माहीम पोलिस ठाण्यात धाव घेत तक्रार दाखल केली.

तक्रारीची गंभीर दखल घेत वरिष्ठ पोलिस अधिकाऱ्यांच्या मार्गदर्शनाखाली माहीम पोलिसांनी तपास सुरू केला. आरोपीविरुद्ध लैंगिक अत्याचारासह पॉक्सो कायद्यातील विविध कलमांनुसार गुन्हा दाखल करण्यात आला. गुन्हा दाखल होताच पोलिसांनी आरोपी अल्पवयीन मुलाला ताब्यात घेतले. त्याच्याविरुद्धची कायदेशीर प्रक्रिया पूर्ण करून त्याला पुढील कारवाईसाठी डोंगरी येथील बालसुधारगृहात पाठविण्यात आले आहे.

दरम्यान, या गुन्ह्यात आणखी एका तरुणाचा सहभाग असल्याचे पोलिस तपासात समोर आले असून त्याचा पोलिसांकडून शोध सुरू आहे. पीडित मुलगी आणि आरोपीला वैद्यकीय तपासणीसाठी पाठविण्यात आले आहे. दोन दिवसांपूर्वी उघडकीस आलेल्या या घटनेमुळे माहीम परिसरातील नागरिकांमध्ये मोठी संतापाची लाट उसळली आहे. पोलिसांकडून या प्रकरणाचा पुढील तपास सुरू आहे.