मुंबईतील अँटॉप हिल परिसरातून धक्कादायक बातमी समोर येत आहे. २७ वर्षीय गृहकाम करणाऱ्या युवतीनं गळफास घेऊन आयुष्य संपवलं. इमारतीत तिचा मृतदेह आढळला. मिळालेल्या माहितीनुसार, ही तरूणी मूळची दार्जिलिंग येथील रहिवासी आहे. ती ज्या फ्लॅटमध्ये काम करत होती, त्याच ठिकाणी वास्तव्यास होती, अशी माहिती मिळत आहे. तिनं आत्महत्या का केली? आत्महत्या करण्यामागचं कारण काय? याचा तपास पोलिसांकडून सुरू आहे.

ही धक्कादायक घटना अँटॉप हिल मोनोरेल स्टेशनजवळील आशियाना सीएचएस, बी - १४ या इमारतीतून उघडकीस आली. मंगळवारी सकाळी ८ च्या सुमारास तरूणीचा मृतदेह आढळला. ती इमारतीतील एका फ्लॅटमध्ये घरकाम करायची. त्याच ठिकाणी ती राहत होती. तिनं ४ नोव्हेंबरला गळफास घेऊन आयुष्य संपवलं.

या घटनेची माहिती मिळताच पोलिसांना याबाबत माहिती देण्यात आली. पोलिसांनी घटनास्थळी धाव घेत तपासाला सुरूवात केली. अँटॉप हिल पोलीस ठाण्याचे वरिष्ठ पोलीस निरीक्षक यांनी युवतीच्या मृत्यूची नोंद केली. तसेच मृतदेह ताब्यात घेतला. तसेच मृतदेह रूग्णालयात शवविच्छेदनासाठी पाठवलं.

दरम्यान, तरूणीनं आत्महत्या का केली? आत्महत्या करण्यामागचं कारण काय? तरूणीची आत्महत्या आहे की तिचा अन्य काही कारणामुळे मृत्यू झाला? याबाबत पोलिसांकडून कसून तपास सुरू आहे. सध्या पोलीस पुढील तपास करत असून, घटनास्थळाचा पंचनामा आणि प्राथमिक चौकशी सुरू आहे.