संजय गडदे, साम टीव्ही

मुसळधार पावसामुळे मुंबईत वृक्ष कोसळण्याच्या घटना सातत्याने घडत असून नागरिकांच्या सुरक्षिततेचा प्रश्न पुन्हा ऐरणीवर आला आहे. गुरुवारी दुपारी सांताक्रूझ येथील रेहेजा महाविद्यालयाजवळ खासगी इमारतीच्या आवारातील एक मोठे झाड अचानक कोसळल्याने आठ जण जखमी झाले. सर्व जखमींना तातडीने नजीकच्या रुग्णालयात दाखल करण्यात आले. उपचारानंतर त्यांना घरी सोडण्यात आले.

महापालिकेला खासगी इमारतीच्या आवारातील झाड कोसळल्याची माहिती मिळाल्यानंतर कर्मचारी घटनास्थळी पोहोचले होते. त्याचवेळी परिसरातील आणखी एक झाड अचानक कोसळल्याने नागरिकांमध्ये एकच गोंधळ उडाला. या घटनेतही काही जण जखमी झाल्याची माहिती समोर आली.

महापालिकेच्या आकडेवारीनुसार, २ जुलै सकाळी ८ ते ३ जुलै सकाळी ८ या २४ तासांत मुंबईत झाडे व फांद्या पडण्याच्या एकूण १९ घटना घडल्या. तसेच गुरुवारी सकाळी ८ ते सायंकाळी ६ या कालावधीत शहर व उपनगरात आणखी ११ ठिकाणी झाडे आणि फांद्या कोसळल्याच्या घटना नोंदवण्यात आल्या.

काही दिवसांपूर्वी चेंबूरमध्ये शाळेच्या बसवर झाड कोसळून एका विद्यार्थ्याचा मृत्यू झाल्याची घटना ताजी असतानाच पुन्हा अशा घटना घडत असल्याने मुंबईकरांमध्ये चिंता व्यक्त केली जात आहे. धोकादायक वृक्षांचे तातडीने सर्वेक्षण करून आवश्यक छाटणी आणि प्रतिबंधात्मक उपाययोजना करण्याची मागणी नागरिकांकडून होत आहे.