Mumbai Khopoli Local Crime News मुंबई लोकलमध्ये हाणामारी होणं काही नवीन नाही. मात्र एका लोकलमध्ये ट्रेनमध्ये एका इसमाने रेल्वे कर्मचारी असल्याचं सांगत आणि धमकावत एका तरुणीची छेड काढली असल्याचा धक्कादायक प्रकार समोर आला आहे. सदर घटना काल म्हणजेच १२ फेब्रुवारी रोजी रात्री १०:३० च्या सुमारास घडली असून प्रवाशांनी संबंधित इसमाला चांगलीच अद्दल घडवली. या घटनेनंतर पुन्हा एकदा महिला सुरक्षिततेचा प्रश्न ऐरणीवर आला आहे.

मिळालेल्या माहितीनुसार, काल रात्री १०:३० च्या सुमारास खोपोली ट्रेनमधून एक तरुणी प्रवास करत होती. यादरम्यान तिथे उपस्थित असलेल्या एका अज्ञात इसमाने रेल्वे कर्मचारी असल्याचं सांगत तरुणीच्या जवळ जात तिची छेड काढली. वांगणी रेल्वे स्थानक येताच त्या मुलीच्या आईने तसेच सहप्रवाशांनी त्या व्यक्तीला स्टेशनवर उतरवून चांगलाच चोप देण्यात आला.

संतापाची बाब म्हणजे हा सगळा प्रकार घडत असताना रेल्वे पोलीस मात्र बघ्याची भूमिका घेत होते. गंभीर बाब म्हणजे हा इसम आपण रेल्वे कर्मचारी असल्याचे सांगून सर्वांना धमकावत होता. आता या प्रकरणी कल्याण रेल्वे पोलिसात त्या व्यक्ती विरोधात गुन्हा दाखल करण्यात आला आहे.

दरम्यान रात्री १०:३० च्या सुमारास देखील महिला सुरक्षित नाही, मग महिलांनी प्रवास कसा करावा? असा संतप्त सवाल प्रवाशांनी केला आहे. या घटनेनंतर पुन्हा एकदा महिला सुरक्षिततेचा प्रश्न ऐरणीवर आला आहे.