नीट पेपर लीक प्रकरणात नव-नवीन धक्कादायक खुलासे समोर येत आहेत. पेपर लीक प्रकरणात शिक्षकांचा सहभाग उघड झाला आहे. त्याचदरम्यान शिक्षण क्षेत्रातील आणखी एक धक्कादायक प्रकार समोर आला आहे. मुंबईतील एका नामांकित शिक्षण संस्थेच्या कनिष्ठ महाविद्यालयाच्या वर्गांना मंजुरी देण्यासाठी एका लिपिकाने लाच मागितली. याप्रकरणी लाचलुचपत प्रतिबंध विभागाने मुंबईतील चर्नी रोड येथे कारवाई करत लिपिकाला अटक केली आहे.

चर्नी रोड येथील विभागीय शिक्षण उपसंचालक कार्यालयातील वरिष्ठ लिपिकाला दीड लाख रुपयांची लाच स्वीकारताना रंगेहात पकडण्यात आले. या कारवाईमुळे शिक्षण विभागात वर्तुळात खळबळ उडाली आहे. राहुल विठ्ठल शिंदे असे या लाचखोर लिपिकाचे नाव आहे. हाती आलेल्या माहितीनुसार, मुंबईतील एका नामांकित शिक्षण संस्थेने त्यांच्या कनिष्ठ महाविद्यालयाच्या वर्गांना मंजुरी मिळण्यासाठी शिक्षण उपसंचालक कार्यालयाला अर्ज केला होता.

सर्व नियम पाळूनही वर्ग मंजुरीची फाईल वरिष्ठ लिपिक राहुल शिंदे यांनी अडकून ठेवली होती. ही फाईल पुढे सरकवण्यासाठी आणि मान्यता मिळवून देण्यासाठी लिपिक शिंदे याने संस्थेच्या प्रतिनिधीकडे थेट दीड लाख रुपयांची मागणी केली. नियमानुसार काम होणार असतानाही पैशांची मागणी झाल्याने तक्रारदाराने लाच देण्याऐवजी ‘एसीबी’ कडे भ्रष्टाचाराची तक्रार नोंदवली.

तक्रार मिळताच ‘एसीबी’च्या अधिकाऱ्यांनी गुप्तपणे या प्रकरणाची पडताळणी केली. शिंदे यांनी लाचेची रक्कम स्वीकारताच ‘एसीबी’च्या पथकाने त्याला रंगेहात पकडले. भ्रष्टाचार प्रतिबंधक कायद्यान्वये त्यांच्यावर गुन्हा दाखल करण्यात आला असून अधिक तपास सुरु आहे.