मुंबई-बंगळूर महामार्गावरील जांभूळवाडी येथील दरी पुलावर शनिवारी मध्यरात्री भीषण अपघात झाला. दोन ट्रक आणि दोन मोटारींच्या झालेल्या या अपघातात २ जणांचा मृत्यू झाला असून, तब्बल १२ जण जखमी झाले आहेत. जखमींना तातडीने रुग्णालयात दाखल करण्यात आले असून, त्यांच्यावर उपचार सुरू आहेत. या अपघातामुळे महामार्गावरील वाहतूक काही काळ विस्कळीत झाली होती.

नेमकं काय घडलं?

पोलिसांनी दिलेल्या माहितीनुसार, शनिवारी रात्री साडेबारा वाजण्याच्या सुमारास एक ट्रक साताऱ्याच्या दिशेने मुंबईकडे जात होता. जांभूळवाडी परिसरातील दरी पुलाजवळ ट्रक चालक प्रमोद विठ्ठल वाघ याचे वाहनावरील नियंत्रण अचानक सुटले. त्यामुळे त्याचा ट्रक त्याच लेनमधून पुढे जाणाऱ्या आयशर ट्रकवर जोरात आदळला. धडक इतकी भीषण होती की, दोन्ही ट्रक दुभाजक तोडून थेट साताऱ्याच्या दिशेने जाणाऱ्या रस्त्यावर आले. त्याचवेळी समोरून येणाऱ्या एर्टिगा आणि टाटा अल्ट्रोझ या दोन मोटारींना ट्रकने जोरदार धडक दिली. काही क्षणांतच चार वाहनांचा भीषण अपघात झाला आणि घटनास्थळी मोठी खळबळ उडाली.

मृतांची नावे समोर

या दुर्घटनेत टाटा अल्ट्रोझमधील आनंदीबाई रामचंद्र वाडकर (वय ५०, रा. नेरूळ, नवी मुंबई) आणि हृदयनाथ मोहन गायकवाड (रा. जोगेश्वरी पूर्व, मुंबई) यांचा मृत्यू झाला. तर दोन्ही मोटारींसह इतर वाहनांमधील एकूण १२ जण जखमी झाले आहेत. अपघाताची माहिती मिळताच आंबेगाव पोलिस ठाण्याचे कर्मचारी, भारती विद्यापीठ वाहतूक विभागाचे पोलिस तसेच अग्निशमन दलाचे अधिकारी आणि कर्मचारी तातडीने घटनास्थळी दाखल झाले.

वाहतुकीवर परिणाम

बचावकार्य सुरू करून जखमींना उपचारासाठी रुग्णालयात हलवण्यात आले. दरम्यान, अपघातग्रस्त वाहने महामार्गाच्या मधोमध अडकल्याने वाहतुकीवर मोठा परिणाम झाला. क्रेनच्या सहाय्याने अपघातग्रस्त वाहने बाजूला करण्यात आली. त्यानंतर महामार्गावरील वाहतूक हळूहळू पूर्ववत करण्यात आली. या घटनेचा पुढील तपास पोलिसांकडून सुरू आहे.