दिवाळीच्या काळात फटाक्यांमुळे होणाऱ्या आगीच्या घटना आणि संभाव्य दुर्घटना टाळण्यासाठी मुंबई महापालिकेने मोठा निर्णय घेतलाय. मुंबई शहर आणि उपनगरांमध्ये रॉकेट तसेच आकाशात उडणाऱ्या बॉम्ब फटाक्यांच्या वापरावर बंदी घालण्यात आलीय. मुंबई महापालिका आयुक्त तथा शहरी आपत्ती व्यवस्थापन प्राधिकरणाचे अध्यक्ष यांनी यासंदर्भात आदेश जारी केलेत.

या आदेशानुसार, ९ नोव्हेंबर २०२६ पासून २५ नोव्हेंबर २०२६ रोजी रात्री ११ वाजून ५९ मिनिटांपर्यंत ही बंदी लागू राहणार आहे. मुंबई महापालिका हद्दीतील सर्व सार्वजनिक आणि खासगी ठिकाणी रॉकेट फटाके उडवण्यास मनाई करण्यात आलीय.

नेमकी बंदी कुठे लागू असणार?

मुंबईतील निवासी इमारती, टेरेस, गच्ची, बाल्कनी, अंगण, खिडक्या, वाहनतळ तसेच झोपडपट्टी परिसरातही रॉकेट फटाके उडवता येणार नाहीत. रॉकेट फटाक्यांचे जळते अवशेष इमारतींच्या छतावर, बाल्कनीत किंवा खिडक्यांमध्ये पडल्यामुळे आग लागण्याचा धोका असतो. त्यामुळे खबरदारीचा उपाय म्हणून हा निर्णय घेण्यात आलाय.

मुंबईसारख्या दाट लोकवस्तीच्या शहरात उंच इमारती आणि झोपडपट्टी परिसर मोठ्या प्रमाणात आहेत. अशा ठिकाणी रॉकेट फटाक्यांमुळे आग लागल्यास मोठी दुर्घटना घडू शकते. ही शक्यता लक्षात घेऊन आपत्ती व्यवस्थापन प्राधिकरणाने प्रतिबंधात्मक पाऊल उचलण्यात येत आहेत.

बंदीची अंमलबजावणी कोण करणार?

या आदेशाची प्रभावी अंमलबजावणी करण्याची जबाबदारी परिमंडळीय पोलीस उपायुक्त, मुंबई महापालिकेचे विभागीय सहाय्यक आयुक्त आणि अग्निशमन दलावर सोपवण्यात आली आहे. संबंधित यंत्रणांना बंदीचे पालन सुनिश्चित करण्याच्या सूचना देण्यात आल्या आहेत.