साक्षी यादव, मुंबई

माऊंट मेरी जत्रेदरम्यान वांद्रे परिसरात धक्कादायक प्रकार घडला आहे. नशेत असलेल्या एका महिलेने पोलिसांशी हुज्जत घालत असताना महिला पोलीस कर्मचाऱ्याच्या दंडाला चावा घेतल्याची घटना समोर आली आहे. या हल्ल्यात वांद्रे पोलीस ठाण्यातील महिला पोलीस शिपाई यशोदा चौगुले जखमी झाल्या आहेत. या प्रकरणी निकी जसिंग्टो या महिलेला पोलिसांनी अटक केली असून, तिच्याविरोधात सरकारी कामात अडथळा आणल्याप्रकरणी तसेच महिला पोलीस कर्मचाऱ्याला जखमी केल्याप्रकरणी कारवाई करण्यात आली आहे.

मिळालेल्या माहितीनुसार, माऊंट मेरी जत्रेदरम्यान एक महिला परिसरात गोंधळ घालत असल्याची माहिती वांद्रे पोलिसांना मिळाली. माहिती मिळताच पोलिसांचे पथक घटनास्थळी दाखल झाले. यावेळी पोलिसांनी परिस्थिती नियंत्रणात आणण्याचा प्रयत्न केला. पोलिसांनी संबंधित महिलेला सुरुवातीला शांत करण्याचा प्रयत्न केला.

तसेच, गोंधळ न घालता तेथून निघून जाण्यास सांगितले. मात्र, महिलेने पोलिसांचे म्हणणे ऐकण्यास नकार दिला. त्यामुळे पोलिसांनी तिला ताब्यात घेण्याचा प्रयत्न केला. याचवेळी परिस्थिती आणखी चिघळली. पोलिसांकडून ताब्यात घेत असताना निकी जसिंग्टो हिने महिला पोलीस शिपाई यशोदा चौगुले यांच्या दंडाला चावा घेतला. या हल्ल्यात चौगुले जखमी झाल्या. त्यानंतर पोलिसांनी महिलेला ताब्यात घेत अटक केली.

माऊंट मेरी जत्रेदरम्यान मोठ्या प्रमाणात नागरिकांची गर्दी असते. अशा परिस्थितीत कायदा आणि सुव्यवस्था राखण्यासाठी पोलीस बंदोबस्त तैनात करण्यात आला होता. त्याचवेळी पोलिसांशी गैरवर्तन करत महिला पोलीस कर्मचाऱ्याला जखमी केल्याने या घटनेची परिसरात चर्चा सुरू झाली आहे. या प्रकरणी निकी जसिंग्टो हिच्याविरोधात सरकारी कामात अडथळा आणणे आणि महिला पोलीस कर्मचाऱ्यावर हल्ला करून तिला जखमी करणे, या आरोपांखाली कायदेशीर कारवाई करण्यात आली आहे. घटनेचा पुढील तपास वांद्रे पोलीस करत आहेत.