संजय गडदे, मुंबई

मुंबई विमानतळावर मोठी कारवाई करत गांजा जप्त करण्यात आला आहे. महसूल गुप्तचर संचलनालयाने (DRI) तब्बल ३९.२ किलो हायड्रोपोनिक गांजा जप्त केला. विशेष माहितीच्या आधारे डीआरआयच्या अधिकाऱ्यांनी बँकॉकहून मुंबईत आलेल्या दोन भारतीय प्रवाशांच्या चेक-इन बॅगेजची तपासणी केली असता ३९ पॅकेट्समध्ये हिरवट रंगाचा सुगंधी पदार्थ आढळून आला.

महसूल गुप्तचर संचलनालयाने तपासणीअंती हा पदार्थ हायड्रोपोनिक गांजा असल्याचे स्पष्ट झाले. दोन्ही प्रवाशांच्या बॅगेजमधून प्रत्येकी १९.६ किलो असा एकूण ३९.२ किलो गांजा जप्त करण्यात आला. पोलिसांनी या दोघांनाही अटक केली. यानंतर करण्यात आलेल्या पुढील कारवाईत गांजाचा एक स्थानिक रिसिव्हरही अटक करण्यात आला.

या प्रकरणात महसूल गुप्तचर संचलनालया एकूण तिघांना अटक केली. तिघांविरोधात एनडीपीएस कायदा १९८५ अंतर्गत गुन्हा दाखल करण्यात आला आहे. जप्त केलेल्या गांज्याची बाजारात मोठी किंमत असल्याचे अधिकाऱ्यांनी सांगितले. या प्रकरणाचा पुढील तपास सुरू आहे. या तिघांच्या संपर्कात आणखी कोण-कोण आहेत याचा देखील तपास केला जात आहे.

दरम्यान, ७ सप्टेंबरला मुंबई पोलिसांनी तेलंगणामध्ये ड्रग्स साम्राज्याचा अंत केला. वसई- विरार आणि मीरा -भायंदर पोलिसांनी तेलंगणातील हैदराबादमध्ये ड्रग्ज कारखान्यावर छापा टाकला. यामध्ये पोलिसांनी तब्बल १२००० कोटी रूपयांचे एमडी ड्रग्ज जप्त केले होते. हा या वर्षातील देशातील सर्वांत मोठा छापा असल्याचे सांगितले जाते. अँटी-नार्कोटिक्स सेल आणि क्राइम ब्रँचने या प्रकरणी आतापर्यंत १२ जणांना बेड्या ठोकल्या आहेत.