Mumbai : मुंबईतील 'या' भागातील पाणी टंचाईची समस्या मिटणार; विंधन विहीर खोदण्याचा कामाला मंजुरी

संजय गडदे, साम टीव्ही

मुंबईच्या वांद्रे (पूर्व) येथे नेहमी भासत असणाऱ्या पाणी टंचाईच्या समस्येबाबत वांद्रे पूर्वच्या नागरिकांनी आमदार वरुण सरदेसाई यांची भेट घेऊन पाणीपुरवठा सुरळीत करण्याबाबत मागणी केली होती. वांद्रे परिसराला आवश्यक पाणीपुरवठा सुरळीत होण्याकरिता आमदार वरुण सरदेसाई यांनी मुंबई महानगरपालिकेचे आयुक्त भूषण गगराणी यांची भेट घेतली होती.

सरदेसाई यांनी त्यावेळी ५ एम.एल.डी. पाणी पुरवठा वाढवून घेतला. परंतु सदर पाणी टंचाईची समस्या कायमस्वरूपी साठी सोडवणे आवश्यक असल्याने आमदार वरुण सरदेसाई यांनी आपल्या स्थानिक आमदार विकासनिधीमधून वांद्रे (पूर्व) येथील नवीन शासकीय वसाहती करीता विंधन विहीर (Borewell) खोदण्याकरिता निधी तरतूद केला.

नवीन शासकीय वसाहतीमधील ६ इमारतीकरिता विंधन विहीर (borewell) खोदणे कामाचा भूमिपूजन सोहळा रविवार १४ सप्टेंबर २०२५ रोजी सकाळी ११.०० वाजता आयोजित करण्यात आला आहे. सदर भूमिपूजन सोहळा आमदार वरुण सरदेसाई यांच्या हस्ते संपन्न होणार आहे. यावेळी सर्व शिवसेना पदाधिकारी उपस्थित राहणार आहेत.

या भूमिपूजन सोहळ्यास सर्व वांद्रे वासियांनी उपस्थित राहण्याचे आवाहन शिवसेना शाखाप्रमुख अरुण कांबळे यांनी केले आहे. नवीन शासकीय वसाहतीमधील नागरिकांनी त्यांच्या पाण्याच्या समस्येवर आमदार वरुण सरदेसाई यांनी कायमस्वरूपी तोडगा काढून या वसाहतीतील मुख्य पाण्याचा प्रश्न सोडविल्याबद्दल आमदार वरुण सरदेसाई यांचे आभार मानून समाधान व्यक्त केले.