Mumbai Airport: मोठी बातमी! मुंबई विमानतळावरील नेटवर्क अचानक गंडलं; प्रवाशांचा उडाला गोंधळ

पावसाळ्यात मुंबईच्या लोकलचे वेळापत्रक हमखास खोळंबलेले पाहायला मिळते. रस्त्यांवरही मोठ्या प्रमाणात वाहनांचे ट्रॅफिक होत असते. आता मुंबईच्या छत्रपती शिवाजी महाराज आंतरराष्ट्रीय विमानतळावर नेटवर्क अचानकपणे ठप्प झाल्याची घटना घडलीय. विमानतळावरील नेटवर्क अचानक ठप्प झाल्याने येथे प्रवाशांची मोठी गैरसोय होते.

ही तांत्रिक अडचणू दूर करण्यासाठी युद्धपातळीवर प्रयत्न चालू आहे. दरम्यान सर्व्हर डाऊन झाल्यामुळे अनेक खासगी हवाई वाहतूक कंपन्यांना मोठा फटका बसत आहे. मुंबईच्या विमानतळावरील सर्व्हरच डाऊन झाल्याने प्रवाशांना मोठा मनस्ताप सहन करावा लागतोय. नेटवर्क गायब झाल्याने विमानांचे उड्डाणही उशिराने होतंय. या तांत्रिक अडचणीमुळे इंडिगो, एयर इंडिया, अकासा, विस्तारा या विमान कंपन्यांना मोठा आर्थिक तसेच अन्य फटका बसतोय. तांत्रिक बिघाडामुळे मुंबई विमानतळावर हळू हळू प्रवाशांची गर्दी वाढतेय.

मुंबईच्या आंतरराष्ट्रीय विमानतळावरील सर्व्हर डाऊन झाल्यामुळे चेक-इन व बोर्डिंगची संपूर्ण प्रक्रिया ‘मॅन्युअल मोड’वर वळवण्यात आलीय. यामुळे प्रवाशांच्या समानाची तपासणी करण्यासाठी वेळ लागतोय. विमानतळावर अचानक नेटवर्कमध्ये समस्या येत असल्याची बाब समोर येताच. आंतरराष्ट्रीय विमानतळाच्या प्रशासनाकडून ही अडचण दूर करण्यासाठी प्रयत्न केले जात आहेत.

विमानतळाची IT आणि कोअर टीमकडून नेटवर्क दुरुस्तीचे प्रयत्न सुरू आहेत. मुंबई आंतरराष्ट्रीय विमानतळावर हा बिघाड नेमका कशामुळे झाला, याचे कारण अद्याप समजलेले नाहीये. सर्व यंत्रणा सुरळीत चालू असतानाच अचानकपणे सर्व्हर ठप्प झाले. दरम्यान विमानतळावरील आयटी टीम नेमकी अडचण शोधण्याचा प्रयत्न करत आहे.

दरम्यान एअर इंडियानं प्रवाशांना नेटवर्क खराब झाल्याची सूचना दिली होती. त्यामुळे उड्डाणे उशिराने होतील असं सांगण्यात आलं होतं. काही वेळानंतर तांत्रिक बिघाड सुधारण्यात आलाय. परंतु संपूर्ण परिस्थिती सुव्यवस्थित होण्यासाठी काही वेळ लागेल असं एअरलाइन्सकडून सांगण्यात आलंय.