अभिजीत देशमुख, कल्याण

Kalyan Latest News :

'शासन आपल्या दारी' या उपक्रमाचं डोंबिवली कल्याण शीळ रोडवरील प्रीमियर ग्राउंडवर आयोजन करण्यात आलं आहे . एकीकडे सत्ताधारी शिंदे गट भाजपकडून मोठ्या प्रमाणात बॅनरबाजी करण्यात आली आहे. या कार्यक्रमाबाबत मनसे आमदार राजू पाटील यांनी लावलेल्या बॅनरमुळे राजकीय वर्तुळात सर्वांच्याच भुवया उंचावल्या आहेत. या बॅनरमुळे मनसे महायुतीत सहभागी होणार का, या चर्चांना उधाण आलं आहे. (Latest marathi News)

मनसे आमदार राजू पाटील यांनी 'योजना कल्याणकारी सर्वसामान्यांच्या दारी' शासनाच्या विविध योजनांबाबत माहिती मिळवण्यासाठी सर्व नागरिकांनी उपस्थित रहावे, अशा आशयाचे बॅनर कल्याण शीळ रोड काटई नाका परिसरात लावला आहे.

राजकीय वर्तुळात मनसे महायुतीत सहभागी होणार असल्याची चर्चा राजकीय वर्तुळात रंगल्या असताना मनसे आमदारांकडून लावण्यात आलेले बॅनरमुळे राजकीय वर्तुळात चर्चांना उधाण आलं आहे.

रविवारी डोंबिवलीतील कल्याण शीळ रोडवरील कोळे गावात प्रीमियम मैदानात 'शासन आपल्या दारी' हा कार्यक्रमाचे आयोजन करण्यात आले आहे. मुख्यमंत्री एकनाथ शिंदे, उपमुख्यमंत्री देवेंद्र फडणवीस, उपमुख्यमंत्री अजित पवार, केंद्रीय मंत्री कपिल पाटील आदी नेते उपस्थित राहणार आहेत.

या कार्यक्रमादरम्यान कल्याण आणि डोंबिवली विविध विकासकामांचे भूमिपूजन आणि लोकार्पण मुख्यमंत्री शिंदे करणार आहेत. या कार्यक्रमाच्या जनजागृतीसाठी सत्ताधारी पक्षांसह शासनाकडून जागोजागी होर्डिंग लावण्यात आले आहेत. यामध्ये मनसे आमदार राजू पाटील यांनी लावलेले बॅनर लक्ष वेधून घेत आहे.

डोंबिवलीतील काटई नाका, लोढा पलावा येथे मनसे आमदार राजू पाटील शासन आपल्या दारी कार्यक्रमात येण्याचे आवाहन नागरिकांना केलं आहे. गेल्या काही महिन्यांपूर्वी मनसे आमदार राजू पाटील सत्ताधाऱ्यांमध्ये आरोप प्रत्यारोपांमुळे राजकीय वातावरण तापलं होतं.

त्यानंतर दिवा येथील रेल्वेच्या कार्यक्रमात मनसे आमदार राजू पाटील आणि खासदार श्रीकांत शिंदे एकत्रित दिसले होते. त्यानंतर आज मनसे आमदार राजू पाटील यांनी थेट शासनाच्या उपक्रमाचा बॅनर लावून नागरिकांना शासकीय योजनांचा लाभ घेण्याचे आवाहन केल्याने राजकीय वर्तुळात सर्वांच्या भुवया उंचावल्या आहेत .