विकास मिरगणे, साम टीव्ही

मनसे नेते अमित ठाकरे यांच्यासह ७० मनसैननिकांवर गुन्हा दाखल करण्यात आला आहे. नेरुळ पोलिसांनी हा गुन्हा दाखल केला आहे. जमावबंदीचं उल्लंघन आणि नुकसान केल्याप्रकरणी ठाकरेंसह मनसैनिकांवर गुन्हा दाखल करण्यात आला आहे. नेरूळ येथील शिवस्मारकाला रीतसर परवानगी न घेता जमावबंदीचं उल्लंघन केल्याने गुन्हा दाखल झाल्याची माहिती मिळत आहे.

मिळालेल्या माहितीनुसार, नेरूळमधील राजीव गांधी उड्डाणपुलाजवळ उभारलेला छत्रपती शिवाजी महाराज यांचा सिंहासनारूढ भव्य पुतळा गेल्या अनेक महिन्यांपासून अनावरणाच्या प्रतीक्षेत होता. आज नवी मुंबईत पक्षाच्या विविध कार्यक्रमासाठी आलेल्या मनसे नेते अमित ठाकरे यांनी रीतसर परवानगी न घेता या पुतळ्याचे लोकार्पण केले. त्यानंतर नेरूळ पोलिसांनी मनसैनिकांसह अमित ठाकरे यांच्या विरोधात गुन्हा दाखल केला आहे.

अमित ठाकरेंवरील हा राजकीय कारकिर्दीतील पहिलाच गुन्हा दाखल झाला आहे. गुन्हा दाखल होणार असल्याची कल्पना अमित ठाकरेंना होती. त्यावर भाष्य करताना त्यांनी म्हटलं होतं की, या कार्यासाठी झालेला हा माझ्यावरील पहिला गुन्हा असेल आणि त्याचा मला आनंदच असेल'.

अमित ठाकरे यांनी पोस्टमध्ये काय म्हटलं होतं?

अमित ठाकरे यांनी सोशल मीडिया पोस्टमध्ये म्हटलं होतं की, महाराष्ट्रात, शिवछत्रपतींच्या भूमीत... महाराजांचा हा अपमान आम्ही कधीच सहन केला जाणार नाही. आज नवी मुंबईत शाखा उद्घाटनासाठी गेलो होतो. त्यावेळी समजलं की तब्बल चार महिने छत्रपती शिवाजी महाराज यांचा पुतळा फक्त लोकार्पणासाठी नेता मिळत नसल्याने घाणेरड्या, फाटलेल्या कापडाने झाकून ठेवलाय. या चार महिन्यांत विमानतळासाठी, दहीहंडी, दिवाळी, दसरा…सगळ्या कार्यक्रमांना नेते पोहोचल्याचे दिसले'.

'स्वराज्याचे संस्थापक, आपल्या आराध्य दैवत असणाऱ्या महाराजांच्या पुतळ्याचे लोकार्पण करायला त्यांना एक तासही मिळाला नाही का? निवडणुकांच्या वेळी महाराजांचा जयजयकार करणारे, भाषणातून महाराजांच्या नावावर टाळ्या घेणाऱ्यांना पुतळ्याचे लोकार्पण करायला वेळ नाही?हे महाराष्ट्रात घडतंय, हेच लाजिरवाणं आहे' ,अशी टीका त्यांनी केली होती.