ऐन निवडणुकीत कारमध्ये सापडली 1,0000000 रुपयांची रोकड; इतकी रक्कम नेमकी कुणाची?

सचिन बनसोडे, साम टीव्ही

स्थानिक स्वराज्य निवडणुकीमुळे राजकीय घडामोडींना वेग आलाय. नगरपंचायत आणि नगरपरिषदेच्या उमेदवारांचा जोरदार प्रचार सुरू आहे. उमेदवारांच्या प्रचाराच्या रणधुमाळी दरम्यान अहिल्यानगरच्या संगमनेरमध्ये वाहनात एक कोटी रुपयांची रोकड सापडली आहे. पोलिसांनी ही रोकड हस्तगत केली आहे.

संगमनेर शहरात एका वाहनात एक कोटी रुपयांची रोकड सापडल्याची माहिती मिळत आहे. शहराच्या प्रवेशद्वारावर निवडणूक आयोगाच्या पथकाने ही मोठी रक्कम हस्तगत केली. ही रक्कम नेमकी कुणाची आणि कशासाठी वापरली जाणार होती, याबाबत तपास सुरू आहे.

पालिका निवडणुकीच्या पार्श्वभूमीवर एवढी मोठी रक्कम सापडल्याने खळबळ उडाली आहे. या घटनेनंतर शहर हद्दीत येणाऱ्या वाहनांवर निवडणूक आयोगाची करडी नजर आहे.

हिंगोलीत आग लागून पाच लाखांची रोकड जळाली

हिंगोलीच्या औंढा तालुक्यातील काठोडा तांडा गावात घराला आग लागून घरातील पाच लाख रुपयांची रोकड जळून खाक झाल्याची घटना घडली. वसंत राठोड असे घराला आग लागून नुकसान झालेल्या व्यक्तीचे नाव आहे. घरात शॉर्ट सर्किट झाल्याने ही आग लागल्याची प्राथमिक माहिती मिळाली आहे.

या घटनेत कुणालाही इजा झाली नसली तरी राठोड कुटुंब मात्र उद्ध्वस्त झालं आहे. या आगीमध्ये घरातील धान्य, कपडे, संसार उपयोगी साहित्य आणि राठोड कुटुंबाने कष्ट करून जमा केलेली पुंजी जळून खाक झाली आहे. या घटनेनंतर राठोड कुटुंबाने वीज वितरण कार्यालयाला नुकसान भरपाई करून देण्याची मागणी केली आहे.