मेट्रो प्रवाशांना अनेकदा तिकिटांसाठी लाईनमध्ये तात्काळत उभे राहावं लागत. काही जण पासद्वारे प्रवास करतात. मात्र आता दहिसर ते अंधेरी पश्चिम मेट्रो २ अ आणि दहिसर ते गुंदवली मेट्रो ७ मार्गिकेवरील प्रवाशांचा प्रवास सुखकर होणार आहे. या मार्गिकेवरील प्रवासासाठीचे तिकीट आता १४ हून अधिक मोबाईल कंझ्युमर अ‍ॅपवरून उपलब्ध करून देण्यात आले आहे.

एमएमआरडीएच्या मेट्रो २ अ आणि ७ मार्गिकेवरील प्रवाशांचा प्रवास अधिक सुखकर व्हावा यासाठी एमएमआरडीएकडून विविध सुविधा उपलब्ध करून दिल्या जात आहेत. त्यातही प्रवाशांना रांगेत उभे राहण्याची गरज भासू नये यासाठी ई तिकिटाची सुविधा उपलब्ध करून देण्यात आली असून आता तिकिटांशी संबंधित अन्यही सुविधा उपलब्ध करुन दिल्या जात आहेत.

याचाच भाग म्हणून एमएमआरडीएकडून ८ आॅक्टोबरला भारतातील पहिल्या एकात्मिक तिकिट अ‍ॅप कार्यान्वित करण्यात आले आहे. मुंबई वन नावाच्या या अ‍ॅपला प्रवाशांचा चांगला प्रतिसाद मिळत असून आतापर्यंत ३ लाखांहून अधिक प्रवाशांनी मुंबई वन अ‍ॅप डाऊनलोड केले आहे. आता मेट्रो २ अ आणि ७ मार्गिकेवरील क्यू आर आधारित तिकिट १४ पेक्षा अधिक अ‍ॅपवर उपलब्ध करून देण्यात आल्याची माहिती मुंबई महानगर प्रदेश विकास प्राधिकरणाकडून देण्यात आली आहे.

ही सुविधा वन तिकीट, रेड बस, रेड रेल, यात्री रेल्वेज, इजी माय ट्रीप, हायवे डिलाईट सह अन्य अ‍ॅपचा यात समावेश आहे. तर लवकरच पे टाईम, उबर आणि रॅपिडो यावरही तिकिट उपलब्ध करुन दिले जाणार असल्याचे एमएमआरडीएकडून सांगण्यात आले आहे. महत्त्वाचे म्हणजे ही सुविधा येत्या काळात वाहतूक सेवेत दाखल होणाऱ्या मेट्रो २ ब (मंडाले, मानखुर्द ते अंधेरी पश्चिम) आणि मेट्रो ९ (दहिसर ते भाईंदर) मार्गिकेवरील प्रवाशांनाही या सुविधेचा वापर करता येणार असल्याचेही एमएमआरडीने स्पष्ट केले आहे.