मुंबई उच्च न्यायालयानं कबुतरखान्यांविरोधात कारवाईचे आदेश दिल्यानंतर मुबंई महानगरपालिकेनं काही कबुतरखाने ताडपत्रीनं झाकले आहेत. यावर काही नागरिकांनी नाराजी व्यक्त केली आहे. कबुतरांची विष्ठा, पिसं यामुळे गंभीर आजारांचा त्रास होऊ शकतो. दरम्यान, मीरारोडमध्ये कबुतरांना दाणे टाकण्यावरून झालेल्या वादातून वृद्ध व्यक्ती आणि त्यांच्या लेकीवर हल्ला झाल्याची घटना घडली आहे.

नेमकं प्रकरण काय?

महेंद्र पटेल (वय वर्ष ६९) हे मीरा रोडच्या ठाकूर मॉलजवळील डीबी ओझोन ३० परिसरातील रहिवासी आहे. रविवारी सकाळी ते दूध आणण्याकरीता गेले होते. यावेळी आशा व्यास या महिला कबुतरांना दाणे टाकत होते. महेंद्र यांनी त्यांना कबुतरांना दाणे टाकू नका असे सांगितलं. महिलेला याचा राग आला. महिलेनं शिवीगाळ करण्यास सुरूवात केली. हा सगळा गोंधळ एकून महेंद्र यांची मुलगी वडिलांजवळ गेली.

वडिलांना का शिवीगाळ करता? अशी विचारणा केली असता, आशा या महिलेला प्रेमललाही शिवीगाळ करण्यास सुरूवात केली. गोंधळ पाहून आशा व्यास यांच्या इमारतीत राहणारा सोमेश खाली उतरला. त्याच्यासह २ अनोळखी लोकही सोबत होते. त्यांनी मिळून प्रेमल यांना लोखंडी रॉडनं मारहाण करण्यास सुरूवात केली.

तर, उपस्थित असलेल्या एकानं त्यांचा गळा दाबला. यानंतर आशा आणि त्यांच्या वडिलांनी काशीमीर पोलिसांकडे तक्रार दाखल केली. तक्रारीनुसार, पोलिसांनी आशा व्यास, सोमेश अग्निहोत्री तसेच इतर दोन अनोळखी व्यक्तींवर गुन्हा दाखल केला आहे.