मुंबईत स्वतःच्या हक्काचं घर घेण्याचं स्वप्न पाहणाऱ्या हजारो नागरिकांसाठी महत्त्वाची बातमी समोर आली आहे. महाराष्ट्र गृहनिर्माण व क्षेत्रविकास प्राधिकरणाच्या (म्हाडा) मुंबई मंडळाच्या २,६४० घरांच्या सोडतीची तारीख अखेर निश्चित झाली आहे. या घरांसाठी अर्ज केलेल्या नागरिकांची प्रतीक्षा आता संपणार असून, ६ ऑगस्ट रोजी दुपारी १२ वाजता वांद्रे येथील रंगशारदा सभागृहात ऑनलाईन सोडत काढण्यात येणार आहे.

विधान परिषद निवडणुकीच्या आचारसंहितेमुळे ही सोडत काही काळ पुढे ढकलण्यात आली होती. त्यामुळे अर्जदारांमध्ये संभ्रमाचे वातावरण निर्माण झाले होते. मात्र, आता अधिकृतपणे सोडतीची तारीख जाहीर झाल्याने अर्जदारांना मोठा दिलासा मिळाला आहे. सोडतीचा निकाल कार्यक्रमानंतर म्हाडाच्या अधिकृत संकेतस्थळावरही उपलब्ध करून दिला जाणार आहे. यंदाच्या सोडतीसाठी ७५ हजारांहून अधिक अर्ज प्राप्त झाले आहेत. त्यामुळे एका घरासाठी सरासरी २८ ते २९ अर्जदारांमध्ये स्पर्धा असल्याचे चित्र आहे. या सोडतीत कोणाचे नशीब उजळणार, याकडे सर्वांचे लक्ष लागले आहे.

दरम्यान, यंदाच्या घरांच्या किंमतींवरून मोठी चर्चा झाली होती. विशेषतः विक्रोळीतील कन्नमवार नगर येथील १२२१ घरांच्या किंमती म्हाडाने नंतर ७.५ टक्क्यांनी कमी केल्या. तरीही अनेकांनी या घरांच्या किंमती सामान्य नागरिकांना न परवडणाऱ्या असल्याचे मत व्यक्त केले. तसेच अर्ज प्रक्रियेदरम्यान काही गटांसाठी रक्कम १ लाख रुपयांपर्यंत ठेवण्यात आल्याने अर्जदारांचा आर्थिक भार वाढल्याचीही चर्चा होती.

या सोडतीत विक्रोळी, गोरेगाव, बोरीवली, चेंबूर, वांद्रे, घाटकोपर, गिरगाव, वडाळा, पवई, माझगाव, दादर आणि अँटॉप हिलसह मुंबईतील विविध भागांतील घरे उपलब्ध आहेत. यामध्ये अत्यल्प, अल्प, मध्यम आणि उच्च उत्पन्न गटांसाठी एकूण २,६४० घरांचा समावेश करण्यात आला आहे.