संजय गडदे, साम टीव्ही, प्रतिनिधी

सर्वसामान्यांना स्वस्तात घरे उपलब्ध करून देणे, अशी म्हाडाची ओळख आहे. मात्र ही ओळख आता हळूहळू पुसू लागली आहे का? असा प्रश्न आता निर्माण होत आहे. म्हाडाच्या मुंबई मंडळाकडून ऑगस्ट 2024 मध्ये मुंबईकरांसाठी दोन हजार घरांची लॉटरी काढली जाणार आहे.

या लॉटरीत गोरेगाव येथे प्रधानमंत्री आवास योजनेअंतर्गत (PMY) उपलब्ध असणाऱ्या घरांच्या किमतीत तब्बल चार लाख रुपयांची वाढ केली आहे. गेल्या वर्षीच्या लॉटरी 30 लाख 44 हजारांना मिळणारे घर आता पुढील आठवड्यात निघणाऱ्या लॉटरीत या घरासाठी तब्बल 34 लाख 70 हजार रुपये मोजावे लागणार आहे.

इंटरेस्ट कॅपिटलायझेशनमुळे या किमती वाढवण्यात आल्याची माहिती सूत्रांकडून देण्यात आली. तर दुसरीकडे ताडदेव येथील क्रिसेंट टॉवरमधील एचआयजी उत्पादन गटातील घराच्या किमतीत कोणताही बदल करण्यात आला नाही.

ताडदेव येथील घराची किंमत गेल्या वर्षीच्या लॉटरीत 7 कोटी 57 लाख इतकी होती. आता या किमतीत कोणताही बदल केला नसल्याची माहिती साम टीव्हीला सूत्रांकडून मिळाली आहे. या सोबतच जुहू येथील विक्रांत सोसायटीमधील घर देखील चार कोटी 87 लाख रुपयांना उपलब्ध होणार आहे.