सचिन गाड, मुंबई|ता. ८ ऑगस्ट २०२४

भारतीय जनता पक्षाचे नेते, आमदार नितेश राणे यांना माझगाव कोर्टाने मोठा धक्का दिला आहे. खासदार संजय राऊत यांनी दाखल केलेल्या अब्रुनुकसानीचा दाव्याप्रकरणी नितेश राणे यांना कोर्टाने अजामीनपात्र वॉरंट बजावण्यात आले आहे. अटक टाळण्यासाठी नितेश राणेंना १७ ऑक्टोबरला न्यायालयात हजर राहावेच लागणार आहे.

शिवसेना ठाकरे गटाचे नेते, खासदार संजय राऊत यांनी ऍड. मनोज पिंगळे यांच्यामार्फत भाजप आमदार नितेश राणे यांच्याविरोधात अब्रुनुकसानीचा दावा दाखल केला आहे. या प्रकरणात आता आमदार राणे यांच्या अडचणी वाढताना दिसत आहेत. याप्रकरणी मंगळवारी झालेल्या सुनावणीला नितेश राणे यांनी दांडी मारली, त्यांच्या वकिलांनी हजेरीपासून सूट देण्याची विनंती केली.

मात्र खटल्यात वारंवार गैरहजर राहणाऱ्या नितेश राणे यांना दिलासा देण्यास प्रथम वर्ग न्यायदंडाधिकारी आरती कुलकर्णी यांनी स्पष्ट नकार दिला व थेट अजामीनपात्र वॉरंट बजावले आहे. नितेश राणेंविरुद्ध यापूर्वीही अजामीनपात्र वॉरंट बजावले होते, त्यानंतरही नितेश राणे खटल्यात गांभीर्याने वागत नसल्याची नाराजी न्यायालयाने बोलून दाखवली.

दरम्यान, कोर्टाच्या या निर्णयामुळे या प्रकरणात अटक टाळण्यासाठी नितेश राणेंना १७ ऑक्टोबरला न्यायालयात हजर राहावेच लागणार आहे. १७ ऑक्टोंबरच्या सुनावणीत कोर्ट काय निर्देश देते? हे पाहणे महत्वाचे ठरणार आहे.