Summary Pointers in Marathi

• वासुदेव गायतोंडे यांच्या पेंटिंगची 67 कोटींना विक्री झाली.

• भारतीय अमूर्त कलेला जागतिक पातळीवर मान्यता मिळाली.

• सॅफ्रनआर्टच्या २५ व्या वर्धापन दिनानिमित्त लिलाव झाला.

• हुसेन यांच्यानंतर गायतोंडे भारतीय कलेतील सर्वाधिक महाग कलाकार ठरले.

शामल भंडारे, साम टीव्ही

एका मराठी चित्रकाराचं पेंटींग तब्बल 67 कोटींना विकलं गेलंय. शीर्षक नसलेलं हे पेंटींग कोणी रेखाटलं आहे ? एव्हढी विक्रमी किंमत या चित्राला का मिळाली आहे? पाहूया या स्पेशल रिपोर्टमधून...

हे चित्र पाहा. हे काही साधसुध चित्र नाही. अत्यंत महागडं चित्र आहे. त्याची किंमत एक दोन नव्हे तर तब्बल 150 मर्सिडीज येतील एवढी आहे. हे ऐकून तुम्हाला आश्चर्याचा धक्का बसला असेल. पण होय. विशेष म्हणचे एका मराठी चित्रकाराने काढलेलं हे पेन्टिंग तब्बल 67 कोटींना विकलं गेलंय. हे पेन्टिंग आहे ऑईल कॅनव्हास या प्रकारातलं आणि ते रेखाटलंय आंतरराष्ट्रीय ख्यातीचे मराठी चित्रकार व्ही एस गायतोंडे यांनी. खरंतर गायतोंडेंच्या पेन्टिंगला एवढी विक्रमी किंमत मिळण्यामागे नेमका काय अर्थ दडलाय? त्याविषयी कलेच्या जाणकारांनी माहिती दिलीय. यांच्या एका ब्रशच्या स्ट्रोकची किंमत कोट्यवधी आहे. त्या गोयतोंडेंची माहिती पाहूयात...

वासुदेव गायतोंडे यांचा जन्म 2 नोव्हेंबर 1924 रोजी महाराष्ट्रातील नागपूर येथे झाला. मुंबईत जे. जे. स्कूलमध्ये शिक्षण घेऊन गिरगावमध्ये ते वास्तव्याला होते. गायतोंडे हे भारतीय अमूर्त कलांचे प्रणेते मानले जातात. सर्वात एकांतवासी चित्रकारांपैकी एक मानले जाणारे गायतोंडे यांनी अमृता शेर-गिल यांच्या 'द स्टोरी टेलर' आणि तैयब मेहता यांच्या 'ट्रस्टेड बुल' ला मागे टाकले. त्यांनी त्यांच्या कलेचे वर्णन "निरपेक्ष" असे केले. जे झेन तत्वज्ञान आणि प्राचीन लिपीतून प्रेरणा घेत होते. १० ऑगस्ट २००१ रोजी दिल्ली येथे त्यांचे निधन झाले.

शनिवारी दिल्लीत सॅफ्रनआर्टच्या २५ व्या वर्धापन दिनानिमित्त आयोजित केलेल्या लाईव्ह इव्हिनिंग सेलमध्ये या ऑइल ऑन कॅनव्हास कलाकृतीचा लिलाव करण्यात आला. हे साधं दिसणाऱ्या पेन्टिंगला दिल्लीतील कला लिलावात ऐतिहासिकरित्या 67 कोटी 8 लाख इतकी विक्रमी किंमत मिळालीय. याआधी विक्रमी किंमत मिळालेली भारतीय पेन्टिंग कुणाचे आहेत? पाहूयात.

एम.एफ. हुसेन यांचे प्रसिद्ध पेंटिंग, "ग्राम यात्रा" हे 118 कोटीला विकले गेले. जे सध्या भारतातील सर्वात महागडं पेन्टिंग ठरलंय. तर दुसऱ्या क्रमांकावर गायतोंडे यांचं 67 कोटींना विकलं गेलेलं पेन्टिंग आहे. एवढंच नाही तर गायतोंडेंचं आणखी एक पेन्टिंग या अगोदर 2021 साली तब्बल 42 कोटींना विकलं गेलंय. हयातीत गायतोंडेंनी अनेक हालअपेष्टा सहन करत कलेची निस्सीम सेवा केली. मात्र त्यांच्या मृत्यूनंतर त्यांच्या कलेला मिळत असलेली प्रसिद्धी आणि पैसा हा त्यांच्या हयातीत त्यांना मिळाला असत तर तेव्हाच या अवलीया कलाकाराला खरी दाद मिळाली असती.