Surabhi Jayashree Jagdish
पावसाळ्यात इलेक्ट्रिक वाहन चार्ज करणं सुरक्षित असतं आणि यासाठी घाबरण्याची गरज नसते. बहुतांश आधुनिक इलेक्ट्रिक वाहनं आणि त्यांचे चार्जर पाऊस व ओलाव्यापासून संरक्षण लक्षात घेऊन तयार केलेले असतात.
चार्जिंग सुरू करण्यापूर्वी चार्जिंग पोर्ट आणि केबलची नीट पाहणी करावी. पोर्टमध्ये धूळ, चिखल किंवा पाणी शिरलेले नाही ना, याची खात्री करणं आवश्यक आहे. सर्व काही कोरडे आणि व्यवस्थित असल्यावरच चार्जिंग सुरू करावेत.
चार्जिंग पोर्ट किंवा प्लगमध्ये पाणी साचलेले दिसल्यास लगेच चार्जिंग सुरू करू नये. प्रथम ते पूर्णपणे कोरडे होईपर्यंत थांबावं. ओल्या पोर्टमधून चार्जिंग केल्यास नुकसान होण्याचा धोका वाढू शकतो.
चार्जिंगसाठी वापरण्यात येणारी केबल कुठे तुटलेली किंवा खराब झालेली नाही ना, हे तपासणं गरजेचं आहे. खराब केबलमुळे चार्जिंगमध्ये अडथळे निर्माण होऊ शकतात आणि सुरक्षिततेचाही प्रश्न निर्माण होऊ शकतो. त्यामुळे नेहमी चांगल्या स्थितीतील केबलच वापरावी.
इलेक्ट्रिक वाहनासाठी वाहन उत्पादक कंपनीने शिफारस केलेला चार्जरच वापरणं योग्य आहे. इतर किंवा दर्जाहीन चार्जर वापरल्यास चार्जिंगची कार्यक्षमता कमी होऊ शकते. तसंच वाहनाच्या बॅटरीवरही त्याचा विपरीत परिणाम होण्याची शक्यता असते.
जर उघड्या जागेतील चार्जिंग स्टेशनवर वाहन चार्ज करत असाल तर त्या ठिकाणची सुरक्षितता तपासणं आवश्यक आहे. चार्जिंग स्टेशन व्यवस्थित स्थितीत आहे आणि त्याठिकाणी पाणी साचलेलं नाही याची खात्री करावी.
चार्जिंगदरम्यान कोणतीही समस्या जाणवल्यास वाहनाच्या User Manual सूचनांचं पालन करावं. गरज भासल्यास अधिकृत सर्व्हिस सेंटरशी संपर्क साधावा. योग्य पद्धतीने आणि आवश्यक काळजी घेऊन चार्जिंग केल्यास पावसाळ्यातही इलेक्ट्रिक वाहन सुरक्षितपणे चार्ज करता येतं.