पिंपरी चिंचवडच्या रहाटणी फाटा येथे आयशर ट्रकच्या धडकेत दोन सख्या बहिणींचा मृत्यू झाल्याची दुर्दैवी घटना घडली आहे. आज दुपारी दीड वाजण्याच्या सुमारास ही घटना घडली आहे. भरधाव ट्रकने दुचाकीवरून जाणाऱ्या दोन सख्ख्या बहिणींना जोरदार धडक दिल्याने या दोन बहीणींचा जागीच अंत झाला आहे. ही घटना दुपारी काळेवाडी येथील धनगर बाबा मंदिरासमोर पेट्रोल पंपाजवळ घडली. मकरसंक्रांती दिवशी दिवशी दोन्ही सख्ख्या बहीणींचा अपघात होऊन जागीच मृत्यू झाल्याने परीसरात शोक व्यक्त केला जात आहे.

ऋतुजा पांडुरंग शिंदे (वय 24) आणि नेहा पांडुरंग शिंदे (वय 20, रा. पुनावळे) अशी मृत्यू झालेल्या बहीणींची नाव आहेत. ट्रकचालक जितेंद्र निराले ( रा.खलघाट, जिल्हा धार, मध्यप्रदेश) काळेवाडी पोलिसांनी अटक केली आहे. घटनेनंतर पोलिस घटनास्थळी दाखल होऊन ट्रक आणि चालकाला ताब्यात घेतले आहे. दुर्दैवी बाब म्हणजे दोन्ही सख्या बहिणी असून मोठी बहीण ही ऍडव्होकेट आहे, तर दुसरी बहीण ही इंजिनिअरिंगचे शिक्षण घेत आहे. सध्या पोलिसांनी चालकाला ताब्यात घेतले असून पुढील तपास करत आहे.

पोलिसांनी दिलेल्या माहितीनुसार, पुनावळे येथील शिंदे कुटुंबाचा मिरची कांडपांचा व्यवसाय आहे. त्यांना या दोनच मुली होत्या. ऋतुजाणे आताच वकिलेचे शिक्षण पूर्ण केले होते. नेहा ही इंजिनिअरिंगचे शिक्षण घेत होती. बुधवारी ऋतुजा आणि नेहा कामानिमित्त गाडीवरुन चालल्या होत्या. काळेवडी येथे धनगर बाबा मंदिरासमोर असलेल्या पेट्रोल पंपाजवळ भरधाव ट्रकने त्यांच्या दुचाकीला धडक दिली. धडकेनंतर त्या खाली पडून गंभीररित्या जखमी झाल्या. त्यांना तातडीने रुग्णालयात दाखल केले. मात्र डॉक्टरांनी त्यांना मृत घोषित केले.