संजय गडदे, मुंबई

मुंबईमधून भीषण अपघाताची घटना समोर आली आहे. मुंबईच्या पश्चिम द्रुतगती महामार्गावर गोरेगावजवळ भीषण अपघात झाला. बेस्ट बसने ट्रकला पाठीमागून जोरदार धडक दिली. या अपघातामध्ये ५ ते ६ प्रवासी गंभीर जखमी झाले आहेत. पहाटेच्या सुमारास ही घटना घडली. अपघाताची माहिती मिळताच पोलिसांनी घटनास्थळी धाव घेत जखमींना तात्काळ रुग्णालयात दाखल केले. या अपघाताचा तपास गोरेगाव पोलिस करत आहेत.

मिळालेल्या माहितीनुसार, गोरेगावमध्ये पश्चिम द्रुतगती महामार्गावर आज पहाटे सहा वाजता भीषण अपघात झाला. ट्रक आणि बेस्ट बसचा मोठा अपघात झाला. गोरेगाव परिसरात वनराई पोलिस ठाण्याच्या हद्दीत ट्रकला बेस्ट बसने पाठीमागून जोरदार धडक दिली. ही बस बोरिवलीवरून अंधेरीच्या दिशेने जात होती. बसने ट्रकला जोरदार धडक दिल्यामुळे बसमधील ५ ते ६ प्रवासी गंभीर जखमी झाले.

या अपघातात बसच्या पुढील भागाचे मोठ्या प्रमाणावर नुकसान झाले आहे. अपघातामध्ये जखमी झालेल्या ५ ते ६ प्रवाशांना तात्काळ जोगेश्वरीतील हिंदू हृदय सम्राट बाळासाहेब ठाकरे ट्रॉमा केअर रुग्णालयात उपचारासाठी दाखल करण्यात आले. गोरेगावमधील वनराई पोलिस ठाण्यात बस चालकाविरोधात गुन्हा दाखल करण्याची प्रक्रिया सुरू आहे. वनराई पोलिसांनी बसचालकाला ताब्यात घेतले आहे. पोलिस या अपघाताचा तपास करत आहेत.