अजय दुधाने, साम टीव्ही

सध्या गल्लीपासून तर दिल्लीपर्यंत महातयुतीची सत्ता आहे. याचाच गैरफायदा महायुतीचे नेते घेतांना दिसत आहे. आम्हाला कोणी काय करू शकत नाही, आमच्याकडे बहुमत आहे अशी मग्रूरीची भाषा या नेत्यांकडून पाहायला मिळत आहे. अंबरनाथ नगरपालिकेचे उपाध्यक्ष यांनी भरसभागृहात भ्रष्टाचार झाला पाहिजे असा कानमंत्रच उपस्थित नगरसेवकांना दिला आहे.

भ्रष्टाचार आणि चोरी काही प्रमाणात झाली पाहिजे, पण टक्केवारी कमी असायला पाहिजे, असं खळबळजनक वक्तव्य अंबरनाथ नगरपालिकेचे उपनगराध्यक्ष सदाशिव पाटील यांनी केलं. अंबरनाथ नगरपालिकेच्या सर्वसाधारण सभेत खुर्चीवर बसून पाटील यांनी हे वक्तव्य केलं. यामुळे आता सदाशिव पाटील अडचणीत येण्याची चिन्हं आहेत.

अंबरनाथ नगरपालिकेची सर्वसाधारण सभा शुक्रवारी आयोजित करण्यात आली होती. या सभेत काही कामांमध्ये झालेल्या भ्रष्टाचाराच्या आरोपांवर चर्चा सुरू होती. या चर्चेदरम्यान उपनगराध्यक्ष सदाशिव पाटील यांनी भ्रष्टाचार आणि चोरी काही प्रमाणात झाली पाहिजे. पण टक्केवारी कमी असायला पाहिजे असं वक्तव्य केलं. यावेळी बाजूला बसलेल्या नगराध्यक्षा तेजश्री करंजुले यांनी त्यांना थांबवण्याचाही प्रयत्न केला. मात्र खरं बोलायला कसली भीती? कोणी फाशी थोडीच देणार आहे, असं म्हणत पाटील यांनी आपल्या वक्तव्याचं समर्थन केलं. यानंतर सभागृहाच्या बाहेर येताच त्यांनी घुमजाव करत मी भ्रष्टाचार होऊ नये, असं म्हणाल्याची प्रतिक्रिया माध्यमांना दिली.

मात्र कॅमेरे बंद होताच त्यांचा सूर बदलला आणि पत्रकारांना दमदाटी करण्यास त्यांनी सुरुवात केली. दरम्यान, नगराध्यक्षा तेजश्री करंजुले आणि शिवसेना गटनेते रवींद्र करंजुले यांनी या वक्तव्याशी आपण सहमत नसल्याची प्रतिक्रिया दिली आहे. त्यामुळे आता भ्रष्टाचाराचं समर्थन करून महायुतीची प्रतिमा मलिन करणारे उपनगराध्यक्ष सदाशिव पाटील यांच्यावर वरिष्ठ नेते काय कारवाई करतात? हे पाहणं महत्त्वाचं ठरणार आहे.