राज्याच्या विविध भागांत गेल्या काही दिवसांपासून हलक्या ते जोरदार पावसाच्या सरी सुरू आहेत. आज मध्य महाराष्ट्र आणि मराठवाड्यात अनेक ठिकाणी विजांच्या कडकडाटासह पावसाची शक्यता हवामान विभागाने वर्तवली आहे. काही जिल्ह्यांमध्ये वादळी वाऱ्यासह पाऊस होण्याचा अंदाज असल्याने नागरिकांना सतर्क राहण्याचे आवाहन करण्यात आले आहे.

IMD च्या अंदाजानुसार, पुणे जिल्ह्याच्या घाटमाथ्यावर आज जोरदार पावसाच्या सरी कोसळण्याची शक्यता आहे. या पार्श्वभूमीवर पुणे घाटमाथ्याला येलो अलर्ट देण्यात आला आहे. घाट परिसरात अचानक पावसाचा जोर वाढण्याची शक्यता आहे. दरम्यान नाशिकच्या घाटमाथ्यासह जिल्ह्यातील काही भागांत पावसाचा जोर वाढू शकतो.

जळगावमध्येही विजांसह पाऊस होण्याची शक्यता असल्याने दोन्ही जिल्ह्यांना येलो अलर्ट देण्यात आला आहे. मध्य महाराष्ट्रातील नंदूरबार, धुळे, अहिल्यानगर, पुणे, सांगली आणि सोलापूर या जिल्ह्यांमध्येही तुरळक ठिकाणी विजांसह पाऊस पडण्याचा अंदाज आहे.मराठवाड्यातही पावसाची स्थिती कायम राहण्याची शक्यता आहे.

छत्रपती संभाजीनगर, जालना, बीड, परभणी, हिंगोली, नांदेड आणि लातूर या जिल्ह्यांत विजांच्या कडकडाटासह पावसाचा अंदाज आहे. काही ठिकाणी पावसाच्या सरींचा जोर वाढण्याची शक्यता आहे. हवामान विभागाच्या अंदाजानुसार, पुढील काही तासांत विजांचा कडकडाट आणि वादळी वाऱ्यासह पाऊस होण्याची शक्यता असलेल्या भागातील नागरिकांनी खबरदारी घेण्याचे आवाहन केले आहे.