माहीम विधानसभा मतदारसंघामध्ये यावेळी हाय व्होल्टेज लढत पाहायला मिळणार आहे. या मतदारसंघातून मनसेकडून अमित ठाकरे यांना उमेदवारी देण्यात आली आहे. महायुतीकडून शिवसेना शिंदे गटाचे नेते सदा सरवणकर यांना उमेदवारी देण्यात आली आहे. तर शिवसेना ठाकरे गटाने महेश सावंत यांना तिकीट दिले आहे. पण सदा सरवणकर यांनी आपली उमेदवारी मागे घ्यावी यासाठी त्यांच्यावर दबाव टाकला जात आहे. सदा सरवणकर यांनी आपली उमेदवारी मागे घेत अमित ठाकरे यांना पाठिंबा द्यावा यासाठी दबाव टाकला जात आहे. पण आपण उमेदवारी मागे घेणार नसल्याचे सदा सरवणकर यांनी स्पष्टपणे सांगितले आहे.

सदा सरवणकर यांनी साम टीव्हीशी बोलताना सांगितले की, 'माझ्यावर प्रचंड दबाव आहे. माझ्यावर दबाव टाकला जातोय आणि मला धमक्या देखील मोठ्या प्रमाणात मिळत आहेत. तरी देखील मी माझ्या मतावर ठाम आहे. मी एबी फॉर्म भरणार आहे. बिनशर्त पाठिंबा देण्यासंदर्भात माझ्याशी कुठल्याही पद्धतीची चर्चा झाली नव्हती. महायुतीतील इतर नेत्याची भूमिका मांडली. त्यांची भूमिका असेल अजून प्रत्यक्षात तसं काही नाही.'

तसचं, 'ज्याअर्थी मला एबी फॉर्म देण्यात आला त्याअर्थी महायुतीचा माझ्या उमेदवारीसाठी पाठिंबा असल्याचे स्पष्ट होत आहे. राज ठाकरे आणि माझ्यामध्ये कुठलाही पद्धतीचं बोलणं झालं नाही. १५ वर्षांत मी बरीच काम केली असल्यामुळे साडेतीन लाख मतदार हे मला निवडून देतील.', असा विश्वास सदा सरवणकर यांनी व्यक्त केला आहे.

लोकसभा निवडणुकीवेळी मनसेने महायुतीला पाठिंबा दिला होता. माहीम विधानसभा मतदारसंघामध्ये सध्या सदा सरवणकर हे विद्यमान आमदार आहेत. महायुतीतील शिदे गटाकडून त्यांनाच उमेदवारी देण्यात आली आहे. ज्याप्रमाणे लोकसभेला मनसेने पाठिंबा दिला तसंच आता देखील होईल आणि याचा सदा सरवणकर यांना फायदा होईल असे वाटत होते. पण मनसेने अमित ठाकरे यांना माहीममधून निवडणुकीच्या रिंगणात उतरवले. त्यामुळे मनसेसाठी ही निवडणूक प्रतिष्ठेची झाली आहे. या मतदारसंघात मनसेने जोरदार प्रचार सुरू केला आहे.