संघर्ष गांगुर्डे, साम टीव्ही

कल्याण डोंबिवली महानगरपालिका निवडणुकीसाठी शिवसेना उद्धव बाळासाहेब ठाकरे आणि महाराष्ट्र नवनिर्माण सेनेचा जागावाटपाचा फॉर्म्युला निश्चित झाल्याची माहिती मनसेचे नेते राजू पाटील यांनी दिली आहे. या युतीअंतर्गत मनसे ५४ जागांवर निवडणूक लढवणार असल्याचे त्यांनी स्पष्ट केले.

माजी आमदार राजू पाटील यांनी सांगितले की, मराठी मतांची ताकद एकत्र आणण्यासाठी उबाठा मनसे युती निर्णायक ठरणार आहे. दोन्ही पक्षांमध्ये सकारात्मक चर्चा होऊन जागावाटपावर एकमत झाले असून, लवकरच अधिकृत घोषणा केली जाईल. याच पार्श्वभूमीवर मनसे अध्यक्ष राज ठाकरे आणि शिवसेना पक्षप्रमुख उद्धव ठाकरे यांची संयुक्त सभा कल्याण डोंबिवलीत आयोजित करण्यात येणार आहे.

या सभेमुळे स्थानिक राजकारणात मोठी खळबळ उडण्याची शक्यता असून, कार्यकर्त्यांमध्ये उत्साहाचे वातावरण आहे. दरम्यान, जे आमच्यातून गेले होते त्यांचे पुन्हा फोन येत आहेत, मात्र त्यांच्यासाठी आमचे दरवाजे बंद आहेत, अशा शब्दांत राजू पाटील यांनी पक्ष सोडून गेलेल्या नेत्यांवर अप्रत्यक्ष निशाणा साधला. युती ठरल्यानंतर अनेकांची भूमिका बदलत असल्याचा आरोपही त्यांनी केला.

जैन मुनीन वर बोलताना राजू पाटील म्हणाले मुनींनी त्यांचं काम करावं ,राजकीय सुपाऱ्या घेऊ नये असा सल्ला मनसे नेते राजू पाटील यांनी जैन मुनींना दिला आहे. उबाठा मनसे युतीच्या या निर्णयामुळे केडीएमसी निवडणुकीत राजकीय समीकरणे बदलणार असून, महायुती आणि इतर पक्षांसमोर मोठे आव्हान उभे राहण्याची चिन्हे आहेत.