• एकनाथ शिंदे यांनी मंत्र्यांची तातडीची बैठक बोलावली

• उपमुख्यमंत्र्यांनी या बैठकीत मंत्र्यांवर नाराजी व्यक्त केली

• दुष्काळग्रस्त जिल्ह्यांचा दौरा करण्याचे त्यांनी मंत्र्यांना आदेश दिले

• शेतकऱ्यांच्या समस्या जाणून घेऊन १० दिवसांत अहवाल सादर करण्याचे निर्देश दिले

राज्याच्या राजकीय वर्तुळातून एक मोठी बातमी समोर आली आहे. उपमुख्यमंत्री एकनाथ शिंदे आपल्या मंत्र्यांवर नाराज आहेत. त्यांनी तातडीची बैठक बोलावून मंत्र्यांना तंबी दिली. दुष्काळामुळे शेतकरी संकटात आहे. असे असताना शिंदेसेनेच्या मंत्र्यांना आपले मतदारसंघ सोडूशी वाटत नाही त्यामुळे एकनाथ शिंदे यांनी नाराजी व्यक्त करत या मंत्र्यांची बैठक बोलावून त्यांना दुष्काळी जिल्ह्याचे दौरे करण्याचे आदेश दिलेत. शिंदेंनी मंत्र्यांना तंबी दिल्याची आता राजकीय वर्तुळात चर्चा होऊ लागली आहे.

राज्यात दुष्काळाची परिस्थिती असताना मंत्री जबाबदारी असलेल्या जिल्ह्यांचे दौरे का करत नाही? असा सवाल एकनाथ शिंदे यांनी बैठकीत केला. ज्या मंत्र्यांना ज्या जिल्ह्याची जबाबदारी दिली आहे त्या मंत्र्यांनी दुष्काळग्रस्त जिल्ह्यांचा दौरा करण्याच्या सूचना शिंदेंनी यावेळी दिल्या. शेतकऱ्यांच्या बांधावर जाऊन त्यांच्या व्यथा नेमक्या काय आहेत? काय मदत अपेक्षित आहेत? येणाऱ्या अडचणी काय आहेत? याचा आराखडा तयार करण्याचे आदेश शिंदेंनी मंत्र्यांना दिले आहेत.

जिल्हाप्रमुख आमदार आणि शहरप्रमुखांच्या बैठका घेऊन प्रत्येक गावात पोहचून परिस्थिती जाणून घ्या अशा देखील सूचना शिंदेंनी आपल्या मंत्र्यांना दिल्या आहेत. दुष्काळी जिल्ह्याचा दौरा करून हा अहवाल पुढील १० दिवसांत सादर करून त्यानुसार शिवसेनेकडून मदतीचे नियोजन करून दसऱ्याच्या शुभ मुहूर्तावर मदत पाठवण्याचे नियोजन करण्यात यावे असे देखील त्यांनी बैठकीत सांगितले. अनेक मंत्री पालकमंत्रिपदाची जबाबदारी असलेल्या जिल्ह्यात फार सक्रिय नाहीत. त्यांनी शेतकऱ्यांच्या बांधावर जाऊन काम करायला हवे अशी खंत मंत्र्यांच्या बैठकीत शिंदेंनी व्यक्त केली.